4388/2024-2025

Lunglei, 2025 Ramtuk thla ni 21: Mizoram hmun hrang hranga African Swine Fever (ASF) natna leng mekin ziaawm lam a pan chhoh lai leh ASF avanga vawk thi report pawh thla khat dawn a awm tawh loh laiin, fimkhur loh chuan hri hi darh leh mai thei reng a nih avangin Lunglei District-a vawk vulhte an lo him zel theih nan leh ASF hri hi dan chah a nih theih nan Lunglei District-a Additional District Magistrate Pu James Miahlung chuan vawiin, February ni 21, 2025 khan Section 163, Bharatiya Nagarik Suraksha Sanhita (BNSS), 2023 tlawh chhanin Lunglei District huam chhunga mipuite zawm turin heti ang hian thupek a chhuah.

"1. Lunglei District huam chhungah ram dang leh state dang aṭangin vawk, vawksa leh vawksa aṭanga siam ei tur chi reng reng lak luh khap tlat a ni.

"2. Lunglei District huam chhunga ASF hri lenna hmun (infected area) aṭangin vawk, vawksa leh vawksa aṭanga siam ei tur lak luh leh lak chhuah khap tlat a ni.

"3. Lunglei District chhunga infected area-a puan ni lo (non-infected area) veng leh veng emaw, khua leh khua emawa vawk inlak pawh tawn turte'n vawk hrisel ṭha chauh lak tur a ni.

"4. Vawk damlo reng reng talh leh hralh khap tlat a ni a, vawk damlo chu dah hran vat tur a ni.

"5. Vawk damlo neite'n a rang thei ang berin District Veterinary Hospital emaw, mahni khua/veng Veterinary Field Assistant (VFA) emaw, Local/Village Council/Task Force emaw te hnenah hriattir vat tur a ni.

"6. Vawk thi leh suat reng reng disinfectant (chinai/bleaching) nen thuk taka phum tur a ni a, bawlhhlawh paihna hmunah leh luikawr remchangah vawk thi chu paih hauh loh tur a ni.

"7. Hri len lohna hmun (non-infected zone) aṭanga hmun danga vawk thawn chhuah tur reng reng chu veng chhung Local/Village Council-te hriatpuina hnuaia mahni bialtu Veterinary Field Assistant (VFA)/Veterinary Officer te'n Rapid Antigen Test (RAgT) hmanga vawk hrisel ngei an ni tih hriatna certificate (soundness certificate) a pek ngamte chauh a ni tur a ni.

"He thupek hian chhuah a nih aṭanga ni 60 (sawm ruk) chhung a huam ang a, thupek zawm lote chu Section 223, Bharatiya Nyaya Sanhita (BNS) hnuaiah hrem theih an ni."