Rampum rualin vawiin khan Lunglei-ah pawh ‘National Voters Day 2014’ chu Saikuti Hall, Venglai-ah hman a ni a. Kumin hi rampuma he Ni hman tum 4-na niin thupuiah chuan ‘Greater participation for a Stronger Democracy’ tih hman a ni.

He ‘4th National Voters Day’ Election Officer, Lunglei Pu Mark Lalthanliana kaihhruaiah hian Khuallian Lunglei DC Pu V.Sapchhunga chuan kum tin Electoral Roll ennawn leh siamthat a ni thin a, kum 18 tling tharte chu thunluh an nih thin thu a sawi a. Voter nih hlutna mipuiin an hre tulh tulh a, tunah chuan EPIC hi mimal chhinchhiahna ‘identity’ berah sorkar thilah leh thildang hrang hrangah hman ber a ni hial tawh a ni, a ti. Khua leh tui tha nih chuan Electoral Roll-a hming dah hi kan tih makmawh a ni a; amaherawhchu politics-a hamthatna duh vanga dik lo taka thunluh hi thil dik lo a ni, a ti bawk. Lunglei District chhunga BLO leh Election hnathawk ten taima tak leh uluk taka Electoral Roll siam leh ennawn hna an thawh thin chungah lawmthu a sawi a. Vawiin inkhawmah hian DC Pu V.Sapchhunga chuan Lunglei District huamchhunga Assembly Constituency 7-a BLO ti thate hnenah Certificate leh lawmman pawisafai Rs.3000/- a hlan nghal a ni.

‘National Voters Day 2014’ puala Chief Election Commissioner, Pu V.S.Sampath thuchah pawh kalkhawmte hmaah chhiarchhuah a ni a. CEC chuan he Ni hi mipuite rorel sorkar thlang thin ram kan nih hriatrengna leh chawisanna ni a nih angin, rampuma Electoral Roll-a hming ziaklut tharte chu lawmpuina leh duhsakna a hlan a ni. Kum 63 kaltaah khan he Ni-ah hian Election Comission of India chu din tan a nih thu sawiin Pu V.S.Sampath chuan ECI hi mipuite thlawpna tello chuan a hna a thawk theih lova, chuvangin rampum khawi hmunah pawh inthlanna felfai, dik leh muanawm neih a nih zel theih nan tanrual a pawimawh a ni tih hre reng turin ram mipui zawng zawngte a chah a ni.

Election Commission of India-in National Voters Day puala a duan thuvawn chhamrualna hun chu Pu K.Laltlawmlova, SO&DTO&ERO-in a kaihruai a. Lunglei Addl DC Dr.Andrew H.Vanlaldika chuan Electoral Roll thar bera kum 18 tling thar leh Roll-a thunluh tharte hnenah EPIC a sem bawk a ni.

Vawiina ‘National Voters Day’ puala rampumah mipuiten thuvawn an chhamrual chu a hnuaia mi ang hi a ni : “Keini, India khua leh tuite hian, mipui rorelna Sorkar-ah rinna nghet tak kan nei a, mipui rorelna kalphung leh ziarang tha tak kan neihte leh inthlanna muanawm leh thianghlim kan neih thinte hlutna leh zahawmnate vawng him zel tur leh, sakhua, hnam leh tawng bik thliar lova, tihluihna leh thlemna eng pawh hnawl a, huaisen taka Vote thlak turin kan intiam e.