Vawiin hian Lawngtlai Press Club-ah National Voters’ Day vawi lina chu hman a ni a, Lawngtlai District Election Officer, Pu J. Hmingthanmawia, MCS chu khuallian a ni.

Thusawiin khuallian chuan India ramah Voters’ Day hman a nih chhan pawimawh tak mai chu vote thlaktute hlutna pholanna leh mipui thlan dik tak sawrkar kan neih ngei theihna tura inzirtirnan a nih thu a sawi a. Vawiinah hian he hmun a kal khawmte hnenah mai nilovin; khua leh tui dik tak vote thlak thei zawng zawngte hnenah pawh a thara hrilh hriatleh a tulin chu hna chu mahni mawhphurhna theuhva kan ngaih a tul ani a ti a.

Hetih rual hian vote thlaktu mipuite hnena zirtirna diklo leh therhlo hmanga in thlemna te erawh c hu chak taka do a, rilru fim taka mipui thlan sawrkar din tura kan tan tlan a pawimawh thu a tar lang bawk a ni. Khuallian chuan nikum MLA inthlan atang khan hetiang kawnga hma lakna chi khat atana Election Comission of India in ruahmanna a siam Systematic Voters Education and Electoral Participation (SVEEP), Lawngtlai District chhunga kalpui dan sawi langin vote thlaktute hnena zirtirna hrang hrang an pek dan leh Facebook thlenga Group an siam thu a sawi bakah Electoral Roll siam thara voters ni thar thalai engemaw zatte hnenah EPIC a hlan bawk a ni.

Inkhawm kaihruaitu Pu VL Remliana, Election Officer chuan Lawngtlai District chhunga vote thlak theite dinhmun (Electoral Roll Status) report pe in, vote thlak hnuhnung ber khan Lawngtlai District chhungah Voters 70526 an awm a, an zinga mi 35600 hi hmeichhia an ni a voters te hian EPIC an nei vek tawh bawk a ni. Amaherawh chu kumin ni 1-10 January, 2014 khan Roll Revision neih leh tawh niin hetah hian mi engmawzat thun thar leh an ni tawh a, he Roll thar hi tun thla ni 29 khian tlangzarh a ni ang.

Kalkhawmte hian diktaka vote thlak turin thutiam an neih bakah Election Commission of India thuchah Pu. C. Lalsangluaia, SDO Sadaar chuan a chhiar chhuak bawk a. Lawngtlai District chhunga Political Party hrang hrangte leh tlawmngai pawl hrang hrang ten thusawina hun an nei bawk.