Rampum huapa vote neitute pual National Voters’ Day chu vawiin khan Mizoram-ah pawh hman a ni a. He Ni pual hmanna pui ber Aizawl Vanapa Hall-a inkhawmah Khuallian Mizoram Governor Pu Vakkom Purushothaman chuan tunhnaia Mizoram Assembly Inthlanpuiah khan election muanawm, thianghlim leh fel fai a awm a, hei hi state-a election buaipuitu leh a mawhphurtu zawng zawng te thawhrimna rah a ni a, ka lawmpui tak zet a ni, a ti.

He programme-ah hian Mizoram Assembly Speaker Pu Hiphei pawh telin Sawrkar senior officer thahnem tak an tel bawk a ni.

Vawiin inkhawm Pu Ashwani Kumar, IAS, Chief Electoral Officer kaihhruaiah Governor chuan Mizoram Assembly tana tunhnaia Inthlanna neiha khan vote tla za zelah 83.41 chu Mizorama Inthlanpui neih tawh zawng zawnga vote tlak thatna tum ber a ni a, hei hi election buaipuitu te, political parties te, tlawmngai pawl leh civil society te, thuthar thehdarhtute leh mipuite inkarah thawhhona tha a awm vang a ni, a ti.

Mipui rorelna democracy hi vote thlak khawm atanga din a nih angin ramchhungah vote nei zawng zawng te chuan an vote hlu tak chu inthlan niah thlak vek thin rawh se tiin Governor chuan inthlanna reng reng dik leh fel leh fai taka buatsaih anih lo chuan mipui rorelna democracy chu a derthawng theih thu leh a hmingchhiat theih thu a sawi bawk.

National Voters’ Day pawimawhna tarlangin Pu Purushothaman chuan he Ni hi ram chhung khua leh tui vote nei pha chin a kim thei ang bera ziahluh Ni atan leh vote nei zawng zawngin an hlutna an hriat thar lehna Ni atan hman a ni, a ti a. Chuvangin he Ni pawimawh tak hi hun bik pangngai dang anga hmang liam mai lo turin leh he Ni bikah ram mipuiin thutiam an lak te kha a takah chantir tura inhlantharna ni-a hmang turin Mizoram mipui te chu a chah a ni.

Vawiin inkhawmah hian inkhawm kaihruaitu Pu Ashwani Kumar chuan thuhmahruai a sawi a, he Ni pual Thutiam lakna neih nghal a ni.Chief Election Commission Pu V.S. Sampath thuchah chu mipui hmuh leh hriat theihin screen lianah chhuah a ni bawk. Mizoram People Forum Vice President leh Central YMA President ni bawk Pu Lalbiakzuala pawh he hunah hian thu a sawi a, Joint CEO Pu H. Lalengmawia’n lawmthu sawiin hun a khar a ni.

Vawiin programme ah hian Governor chuan Aizawl District huam chhunga Booth Level Officer (BLO) tha ber thlanchhuah pathum leh tun Assembly Inthlanpuia Vote tlak thatna ber District pathum thlanchhuah te hnenah thuziak leh lawmman a hlan bawk a ni.

Best Booth Level Officers (Aizawl District): 1). Pu C. Zanghinglova ; 2) Pu F. Lalenghluna ; 3). Pu Vanlaldinpuia te an ni.

Mizoram Assembly Inthlanpui 2013-a Vote tlakna sangber District pathum te chu 1) Mamit District 2) Lunglei District leh 3) Serchhip District te an ni. Heng lawmman hi heng District pathum DC aiawh ten hnenah hlan an ni.

Heng bakah hian EPIC thar dawngtu mi 21-te hnenah Khuallian hian EPIC a hlan nghal bawk a ni.

National Voters’ Day hi 25 January, 2011 atang khan ram pumah hman tan a ni a, kumin hi a tum 4-na a ni nghe nghe a ni. Election Commission of India hi hemi ni vek January ni 25, 1950 khan din a ni.

Attachment

  • Loading attachment...