Mizoram hmun dangte rualin Lunglei-ah pawh vawiin khan Dr.S.R. Ngunchamliana, DNO, NTCP-cum-Member Secretary kaihhruaina hnuaiah DC’s Complex-ah ‘2nd Mizoram Anti Tobacco Day’ hman a ni a. He hunah hian Lunglei Addl. DC Pu H.Lianzela, CMO Dr. V.L.M.S. Dawngliana, department hrang hrang officials, Anti Tobacco Squad members bakah NGO leh Media aiawhte te an tel.

Anti Tobacco Day hawnna inkhawmah Addl. DC Pu H.Lianzela chuan Anti Tobacco Squad member-te thahnemngaihna leh thawhrimna fakin, taima taka Lunglei khawpui leh a chhehvel an vil thin chu rah tha a nei chho zel a ni, a ti a. India ramah Mizoram chu vaihlo hmang tamna ber state niin, Mizoram a cheng puitling 96.5% chu mei an zuk emaw an bul hnaia mite zuk emaw avanga meikhu in a ur thin an ni a, hemi a hrin chu Mizoten vaihlo kaihhnawih natna kan ngah pha a, Cancer natna vei tam ber state tiha hriat kan ni hial a ni, a ti. Mizoram hi ‘tobacco free society’ ah siam i tum theuh ang u tiin Pu Lianzela chuan a bik takin naupang chenna hmunah chuan insum a tul thu leh kohhranah te pawh vaihlo that lohzia auhpui fo a ngai tawh a ni, a ti.

Dr.S.R. Ngunchamliana, DNO, NTCP pawhin thusawiin kum 2010-a Global Adult Tobacco Survey neih khan Mizoramah kum 15 chin vaihlo a fihlim lo chu 67.2% a ni a, kum 2013-ah tlem a tla thla in 60.4% a ni ta a, chuti chung pawhin a la sang filawr lak a ni, a ti a. India ram pumah vaihlo nghei hlen ta chu 5% nia chhut a ni a, Lunglei District an zir chiannaah chuan vaihlo nghei hlen ta chu 8%-9% a ni, a ti. Vaihlo hi khap a ni lo naa Dan khauh tak hnuaiah khuahkhirh zel a ni a,COTPA Dan hmangin Anti Tobacco Squad te chuan hmun hrang hrang tlawhin puipunnaa meizial zu bakah he Danin a phal loh thil zuarte chu manin hrem an ni thin a ni tih a tarlang bawk.

Anti Tobacco Day hawnna inkhawm neihah hian COTPA 2003 Dan bawhchhiat avanga thil mante tihralna hun Addl DC Pu H.Lianzela hmahruaiin neih a ni bawk a. hetah hian Foreign Cigarettes bawm 166, Gutkha products (Shikhar, Rajnigandha, etc) bawm 3453 leh khawchhak siam Smoke Candy bawm 140 tih ral a ni. Heng thil mante tihral te hi pawisafaiin Rs.14,901/- man hu a ni. Hemi zawhah hian ‘Mass Squad Drive’ nei turin Anti Tobacco Squad te chu Addl DC Pu H.Lianzela-in a vailiam a ni.