Nihnih awh tur Training of  Public Prosecutors chu Pu Lalsawta, Minister of  Law & Judicial  etc. chuan vawiin khan Tourist Lodge, Chaltlang-ah a hawng.

Public Prosecutor ten training an neih a hmanpui thei chu lawmthu sawiin khuallian Pu Lalsawta chuan tunhma zawng aiin criminal case hi tun dinhmunah a hluar zawkin chanchintharah te pawh pawikhawihna hmuh tur a tam ta tial tial a. Sorkar in dan tumin theihtawp chhuah reng mahse Mizoram ah ngei pawh a thleng reng tho va, chuvangin englai pawhin venhimna kawngah sorkar leh mipui inralrin tir reng hi thil harsa tak ni mahse pawikhawihtute zalen lohna tura hma kan lak a ngai a ni, a ti.

Public Prosecutor te chu sorkar aiawh chauh nilovin mipuite aiawh an ni a. State of Mizoram Vrs Accused tih awmzia hi The People of Mizoram Vrs Accused tihna angah ngaia mipui venhimna kawnga an hnate chu ngai pawimawh turin Minister chuan trainees te chu  chahin an pawimawhna chu hre reng  tur leh mipuiten an thlamuan phahin anmahni ah an in nghat a ni tih hria a Sorkar aiawha Court a ding an nih chu hre reng turin a chah. Kan ram hi misualte zalenna ram, Police man leh mahni pawikhawih puang hialte chhuah zalenna ram anih loh nan dan ang thlapa misualte hrem an nih theihna tura theih tawp chhuah turin a ngen nghal bawk a. He training ah hian Court roreltuten pawikhawihtu chu a thil tih phu tawka an hrem ngei theih theih tura tanlak chu zirchhuak tura a duh thu a sawi. Pawikhawih apiang an phu ang tawka hrem an nih zel chuan pawikhawihna hi a tlahniam angakanram chu society nuam leh him a lo ni dawn a ni, a ti.

Pu Zahmingthanga Ralte, Joint Secretary, Law & Judicial kaihhruai vawiin training hawnna ah hian Pu R. Thanga, Secretary, Law & Judicial in sawihawnna hun hmangin an kalphung turte a sawi a. Dan leh Thupek in a kaihhnawih hrang hrangte zir hovin Silchar  atanga lokal Resource Person 2 - Pu Souman Choudhury, Addl. Public Prosecutor leh Pu Sanjay Dey, Addl. Public Prosecutor ten zirtirna an pe a ni.