Vawiin hian Lawngtlai DC Conference Hall ah Mizoram State Anti- Tobacco Day vawi 2 na chu District Tobacco Control Society bul tumin hman a ni a, vaihlo leh a kaihhnawih that lohna inzirtir a ni.

Chief Medical Officer Dr. H. C Thangkima kaihhruai inkhawmah hian Pu Z.T. Vawra Hmar, District Consultant Mizoram State Tobacco Control Society chuan a lem nena entirin Vaihlo, Sahdah, Kuva leh Gutkha lam chi hoten mihringte hriselna a khawih pawi dan te, kan kianga awmte pawhin nasa taka an tawrh ve dan te, kan tu kan fate thlenga an lo tawrh ve dan te a sawifiah a ni.

He inkhawma khuallian Rev Dr. L.H. Lalpekhlua, General Secretary LIKBK pawhin thu sawiin hmana kan pipute nunphung thalo hote chu kalsan ngam a tul thu a sawi a, zuk leh hmuam te pawh chung zinga mi chu an ni a ti. In zirtirna tam zawk nei zel tura hmalak leh a zuartu kan la tam lutuk te pawh hi tihtlem emaw, khap emaw a hun tawh hle nia a hriat thu a sawi bawk.

Global Adult Tobacco Survey (GATS) zirchianna thar berah chuan Mizoram hi India rama zuk leh hmuam ti tam berna State kan ni mek a, puitling za zela 67 ten engkawng emaw talin zuk hmuam hi an ti a ni. Kan dawtah Nagaland awmin an ni hi 57% an ni thung. Mizorama thihna min thlentu natna langsar te chu pakhatnaah Cancer, pahnihna Malaria leh pathumnaah Thawhah leh khuh benvawn lam chite an ni mek a ni.

Vawiina State Anti-Tobacco Day hmannaah hian zirlai naupangte, zirtirtute, Officer hote, tlawmngaipawl hrang hrang leh kohhran hruaitute an tel a ni.