Vawiin chawhma khan Convention Centre, Lunglei ah Department of Personnel & Administrative Reforms (DP&AR) leh Information & Public Relations (I&PR) Government of Mizoram te tangkawp buatsaih ‘Awareness Campaign on The Mizoram Right To Public Services Act 2015’ hun hman a ni. He hunah hian Pi K.Lalrinzuali, Deputy Commissioner, Lunglei District chu khuallian niin Pu H.Lalthansanga, President, MJA Lunglei chu khualzahawm a ni.

Lunglei DC Pi K.Lalrinzuali chuan The Mizoram Right to Public Services Act 2015 chu Dan tha tak leh mipuite tana tangkai tak a ni tiin DP&AR leh DIPR tangkawpin  mipuite hnena puanzarna leh zirtirna Campaign an buatsaih chu lawmawm a tih thu a sawi a. Dan kan hriat loh avangin Sawrkar atanga hun reilote chhunga kan hmuh tur te pawh rei tak tak kan nghak fo thin a, chuvangin Dan leh hrai hi kan hriat a tul a ni tiin He Act hnuaia dikna chanvo (Right) neitu mipuiten kan hman thiam poh leh dan tha leh tangkai a nih zia a lang chho zel dawn a ni, a ti. He Dan hnuaia service sengluh tawh service 46-te bakah zirlai leh mipuite tana tangkai tur Birth certificate, Tribal certificate, Income certificate te pawh sengluh theih ni se tha a tih thu a sawi bawk.

Khualzahawm Pu H.Lalthansanga, Lunglei MJA President pawhin thu sawiin khawvel  changkang chho zelah Dan thar hrang hrang a lo awm zel a, heng Dan te lo zirchiang tur leh zir thiamna hmanga mahni dikna, chanvo leh mawhphurhnate hlen ngei tura tan la turin kalkhawmte a sawm a. MRPSA 2015 chu mipuite tana siam a nih ang ngeiin kan hman tangkai thiam a tul a ni, a ti bawk. He dan thar duhawm tak hi zau thei ang bera puanzara hman tangkai  anih theihna tura tanla theuh turin mipuite a sawm nghal a ni.

Vawiin program kaihruaitu leh Resource Person ni bawk Pi C. Lalremruati, DIPRO Lunglei chuan The Mizoram Right To Public Services Act 2015 chungchang zirtrina a pe a. Pi Hmingthanmawii Chhangte, UDC, I&PR in lawmthu sawiin hun a khar. Vawiin  ‘Awareness Campaign on The Mizoram Right To Public Services Act 2015’ program ah hian MJA, VC Association, YMA  MUP, MHIP aiawhte leh Government LeitlangHigher Secondary School naupang thahnem tak an tel a ni.

Mizoram Sawrkarin mipuite hnena “service” chi hrang hrang a pek chhuah thinte hunbi tiam chhung ngeia a pek chhuah thinna tur dan “The Mizoram Right to Public Services Act, 2015” hi December Ni 1, 2015 khan hman tan a ni a.

He dan Section 4-na tlawhchhanin Mizoram Sawrkar hnuaia Department hrang hrang paruk(6) heng – Transport Department, Taxation Department, Rural Development Department, Finance Department, Social Welfare Department leh Public Health Engineering Department te’n mipuite hnena “service” an pek chhuah thin sawmli leh paruk (46) te chu khua leh tui (citizen) in “service” pe chhuaktu Designated Officer hnena ziaka dilna a thehluh atanga hunbi tiam chhung ngeia an dawn theihna turin Sawrkar in Notification a lo chhuah tawh a. Section 4(1) in State sawrkar a thuneihna a pek angin he dan hnuaiah hian mipui mamawh “service” hrang hrang te a tul dan ang zelin dah/sengluh theih a ni bawk.

Khua leh tui te’n he dan hnuaia “service” te dilna an thehluhin fel fai taka dilna form awm apiang te ziah leh document thehluh ngai apiang thehluh tur a ni a, Sawrkar hnathawk “service” pe chhuaktu “Designated Officer” a ruat chuan he dan hnuaia “service” dah tawh te chu a diltu hnenah hunbi tiam chhungin a pe ngei tur a  ni.

He dan hnuaia lungawilohna thlenna tur pakhatna “First Appellate Authority” leh lungawilohna thlenna tur pahnihna “Second Appellate Authority” te State sawrkar-in Section 4(3) hmangin a ruat vek a. Lungawilohna thlen tum khatna hi “service” dilna siamtu khan a thehlut thei a, “service” dilna an hnawl emaw atanga ni 30 chhunga siam tur a ni a, engemaw harsatna bik avanga dilna thlentu in hun tiam chhunga  lungawilohna a thlen theih loh in ni 60 thleng hun hi pawhsei theih a ni.

First Appellate Authority chuan Designated Officer in chhan leh vang mumal tak awm lova miin “service” a dil chu  hunbi tiam chhunga pe lovin a lo tikhawtlai nia a hriat chuan hunbi tiam ral hnu atanga a pek chhuah hma zawng nitin Rs. 250 a chawitir thei a, Rs. 5000 thleng chawitir theih ani. Second Appellate Authority chuan First Appellate Authority in chhan leh vang mumal awm lovin lungawilohna a hnena thlen chu hun tiam chhunga a  rem lohvin Rs. 500 atanga  Rs. 5000 thleng a chawitir thei bawk a ni.

He dan hi Mizoramah kum 3 chuang hman tawh a ni a, chutih rualin a hmangtu tur mipui te’n he dan hi an la hmelhriat tawk lo niin Sawrkar chuan a hria a. Kum 2018 August thla atang khan District/Sub Division leh RD Block hrang hrang te tuamin he dan hi mipuite hnena zirtirna kalpui mek a ni a. The Mizoram Right to Public Services Act, 2015 chungchanga hriattur pawimawhte chu DP&AR website dpar.mizoram.gov.in ah engtik lai pawhin hmuh theih reng a ni.