Vawiin khan Chapchar Kut Organizing Committee chuan an Chairman Chief Minister Pu Zoramthanga hovin CM's Conference Hall-ah kumin February ni 28 leh March ni 1 chhunga Chapchar Kut lawmna thlirletna an nei. Co-Chairman Art and Culture Minister Pu R. Lalzirliana pawh a tel. Chairman hian Chapchar Kut Souvenir a tlangzarh bawk a ni.

Meeting-ah hian Chapchar Kut Organizing Committee Secretary hnen atangin kumin Kut hman dan tlangpui ngaihthlak niin Treasurer hnen atangin kut lawmnaa sum senso tlangpui ngaihthlak a ni bawk a. Kumin Chapchar Kut hi "Zofate Inpumkhatna" tih thupui a hmangin Aizawl District ah chuan Lammual a lawm a ni a. Organizing Committee-in State pawn atanga Zohnahthlakte sawm tur a tih anga sawm niin, Falam atangin mi 5, Tedim atangin mi 5, Manipur atangin mi 4, Haflong leh Karbi Anglong atangin mi 7 ve ve kut chhim in an lo kal a ni. Lammual sirah Food Stall 20 leh Handloom Stall 19 siam niin, Flower show leh photo exhibition te neih a night bakah Museum a thil dah that te mipui hmuh tura phochhuah a ni a. A vawikhatna atan sport lama Mizote tihmingthatu mi 3 hnenah chawimawina Nopui hlan a ni. Kumin Chapchar Kut lawmnaah hian Mizoram chhunga district zawng zawng bakah a tumkhatna atan state pawna Mizoram House-ahte pawh hman a ni.

Vawiin meeting chuan kut buatsaih leh zel tura hmalak a awlsam zawk nan Chapchar Kut Organizing Committee hnuaiah Working Chairman atan Art & Culture Minister awm ni se tia relin, ani hnuaiah hian working sub-committee siam rel a ni a. Chairman chuan mi hmuh tlak kut ropui tak neih theih a ni chu lawmawm a tih thu leh chanvo hrang hrang chelhtuten an mawhphurna an hlen tha viaua a hriat thu a sawi a. Kut neih leh hunah discipline theih tawk a tha a kenkawh ni se a ti a ni.