Vawiin chawhma dar 10:00 khan Saikut Hall, Lunglei-ah YMA Sub-Hqrs. leh Outlook Magazine tangkawpin, Lunglei khawpui chhunga pawl 10 leh 12 zirlaite tan Career Mass counseling a buatsaih a, he hunah hian Pu S. Laldingliana, Parliamentary Secretary chu khuallian niin, Dr. K. Pachhunga Associate Professor, Lunglei leh C. Lalrhriatpuia Editor, Students Outlook ten kalkhawmte Career Counseling an pe a, fuihna thu YMA Sub-Hqrs. Lunglei hotute P. Lalhmangaihzuala, Preisdent leh K. Lalfakzuala, Secretary te hnen atangin ngaihthlak a ni bawk.
Parliamentary Secretary chuan Mizo thalaite, a bikin zirlaite chu eizawnna kawnga kawhhmuhna fumfe an dawng tha tawk lo niin a sawi a, kan rama thalaite thiam leh theihna lo tla hniam taah hian a kaihruaitu tur zirtirtu, khawtlang, pawl leh kohhran hruaitute'n thui tak mawhphurhna kan nei a ni a ti. Kan ramah Educational Qualification ropui tak tak nei thiamna lama sang si lo leh chhawr tlak lo kan tam tawh thu sawiin, a chhan pakhatah zirna leh zirna Quality a chhiat tak vang a ni a ti. Zirtirtu tam tak hlawh duh vang chauh a  zirtirtu an tam ta lutuk leh zirlai rual elna chang hre lo ten State dangte min phak loh tir a ni a ti. Kan ram zirna lo tla chhe ta siamtha leh tur hian khawtlang leh kohhran Programme tam ta lutuk lakah zirlaite kan awl thiam a ngaih thu sawiin, zirtirtu te pawh an rual u zawk, mi inpe thin tak tak te hnung zuina kawngah harh thar leh se tun aiin hma kan sawn chak hle ang a ti.