Nimin Dt.11.6.2013 khan Disaster Mangagement and Rehabilitation leh Lunglei DC tangkawp buatsaihin, chhiatrupna thleng thei laka invên dan inzirtirna, 'Disaster Awareness Campaign' chu Community Hall Tlabungah buatsaih a ni a, he huna khuallian Pu Nihar Kanti Chakma Disaster Management and Rehabilitation Minister chuan thu sawiin, "Khuarêl chhiatna hi engtik lai pawha thleng thei a nih avangin kan inrálrin reng a tul a, hemi atan hian Sorkar chuan theihtawp chhuahin hma a la zel dawn a ni, a ti a, chhiatna thleng thei laka mipui sahimna tur ngaihtuah chu Sokar thil tum a ni tih sawiin, Mizoram sorkar ngaihpawimawh ber chu mipui nunna leh himna a ni a, hemi atan hian tha thlah lovin Sorkar-in hma a la chho zel dawn tih a sawi.

AH & Vety minister chuan, khuarêl chhiatna thlengin ram ei leh bâr dinhmun a chhe zawngin a nghawng thin tih a sawi a; "Ram tam tak economy chhiatna chhan pakhat chu Natural disaster an tuar vang a ni." a ti. Tun hnaia Mahasen thlipui tleh tur nia sawi lâwk a nih avangin, Sorkar chuan theihtawp chhuahin mipui hnenah inralringa fimkhur tura chahin hma a la tih a sawi.

Chhiatrupna laka invên dan inzirtina hun hman a nih rual hian, a bial chhung zirna in atanga HSLC leh HSSLC first division leh distinction-a passed zirlai tithate hnenah Minister hian laptop a sem nghal a; hei bakah hian Tlabung khawchhunga YMA branch thenkhat hnenah Minister hian Mizo hnam thuam leh Tarpouline a sem nghal a ni.

Chawhnu lama he hun hman chhunzawmnaah hian, sawm bîkte hnen atangin chhiatrupna thlen thulha chhanchhuah hna thawh dan, kawng hrang hranga zirtirna an pêk te ngaihthlak a ni.