Vawiin khan Mizoram Pig Producers’ Co-operative Federation (PIGFED) Ltd. khawmpui lian vawi 20-na Synod Conference centre-ah neih a ni a. Pu P.L.Thanga, NLUP Implementing Board Vice Chairman & Member Secretary Planning Board chu Khuallian a ni.
Zoram hmun hrang hranga vawkvulhtute intel khawmna PIGFED hi kum 1989 June thla ah pawl anga registered niin a hnuaiah society 164 an awm mek a. An pawl hmalakna zinga langsar tak Base Pig Breeding Farm Thenzawl ami chu NEC suma bul tanin Mizorama vawk chi tha vulh punna hmanrua atan leh hmarchhak bial te entawn turin din a ni a. NLUP Infrastructure development fund atangin he Farm chei thatna tur leh vawk dah belh tur lei nan kum 2011-12 khan cheng nuai 20 leh kum 2012-13 ah nuai 15 pek an ni.
Pu P.L.Thanga chuan kum 2007 atanga 2012 inkara PIGFED in vawk note a thar chhuah zat enin kum 5 chhunga a thar chhuah punna chu ram chhung mamawh thlirin a tawk lo hle a ti a, vawk population tipung turin nasa taka tan lak a ngai a ni, a ti a. NLUP hnuaiah vawk vulh thlang mi thahnem tak an awm chungin, tun thlenga vawknote leh a sa ei tur indaihlova kan la awm chu thil zahthlak a ni, a ti. PIGFED hnuaia vawkvulh society te chu vawknote tipung tura target fel tak siam a, ruahmanna anga ke pen turin Pu P.L.Thanga chuan a chah a. Sum chungchang ah taima zawka project siam leh bawhzui a tul tih sawiin Planning Commission-in Mizoram hman tura sum a ruahman sak pawn lamah hai chhuah tur tam tak a awm reng a, hmarchhak state te tan bik sum dah hran za zela 10% chauh pawh Mizoram in hai chhuak se, hmasawnna leh intodelhna hna thawhna tham a ni, a ti a. Hlawhtling taka cooperative movement kalpuina hnuaia society te kalphung leh hnathawh dan te tarlangin Pu P.L.Thanga chuan society nung tak nei turin hnathawktu te tih phur thiam leh ruahmanna tha neih a, rinawm leh taima taka chu ruahmanna bawhzui chu a pawimawh ber a ni, a ti.
Thusawitu dang Dr.L.B.Sailo, Director AH&Vety chuan Mizoram-a vawk chi tha vulh pung tura department hmalak mekte tarlangin Artificial Insemination hmanga vawk kah raina chu hmarchhak state 7 te chawm thei tura tih changtlun mek a ni a ti a. Aizawl khawpui ah thla tin vawk 3117 vel leh Mizoram pumah nikum 2012-13 chhung khan vawk 79574 talh a ni tih tarlangin Pu L.B.Sailo chuan ranvulh chu ei leh bara intodelhna tura Mizoram kalkawng tur a ni, a ti a.Ran chaw a intodelh turin nasa zawka hma lak a tul thu a sawi bawk.
PIGFED khawmpui hi Dr.C.Lianmawia, Chairman PIGFED Ltd. in a kaihruai a. Dr.Lalnuntluanga Colney, Managing Director in annual report a pe a, Pu Lalpekliana, Registrar, Co-operative Societies chuan thu a sawi bawk a. Chawhnu lamah rorel leh hruaitu thlanna neih a ni.
