Zan hnih riak tura Aizawl rawn tlawh mek British High Commissioner Sir James Bevan, KCMG chuan vawiin chawhma khan Mizoram Governor Pu Vakkom Purushothaman chu a chenna In Raj Bhawan ah a hmu a, inpawh leh tlangnel takin thil pawimawh chi hrang hrang an sawi dun. High Commissioner hi Kolkata –a British Deputy High Commissioner Pu Sanjay Wadvani; Mainak De, Head Political & Public Affairs Department, British Deputy High Commission, Kolkata leh Pu William J Smith, Regional Overseas Security Manager ten an tawiawm a ni.

British Sawrkar mi pawimawh hian Mizoram Chief Secretary Pi L. Tochhong pawh a office-ah hmuin in kawmna hun tha tak a nei a. Pi L. Tochhong chuan Mizoram chanchin tlangpui, hmasawnna kawng hrang hrang a zawh mek leh harsatna awm thei thenkhate a hrilh a.State ralmuang leh mipui mimir nun zalen tak nih thu te, zirna, hriselna, thalai nun leh hmasawnna ruhrel hrang hrang te a hrilh a.

High Commissioner Sir James Bevan chuan Mizoram chu ziak leh chhiar thiam tamna state leh khualzin veivak hip thei tur tak nia a hriat thu te, zirna kawnga ram pawn thlenga Mizoram zirlaite an kal theih dan tur kawng buatsaihpui a in huam thu te, a bikin eizawnna tling thiamna tangkai tak tak zawnpui dan tur a awm thu te a hrilh a ni.

Vawiin chawhnu khan tualchung chanchinbu mite nen I & PR Conference Hall-ah Press Conference a hmang bawk.

British High Commissioner pual hian zanin ah Chief Minister Pu Lal Thanhawla chuan zanriah a buatsaih sak dawn a ni.