Mizoram Education Mission Society (MEMS) Governing Body Meeting vawi 8-na vawiin khan Chief Minister’s Office Conference Room-ah MEMS President Pu Lal Thanhawla, Chief Minister kaihhruaina hnuaiah neih a ni.

Chief Minister chuan zirna, education file hi mihring an nih avangin education-a harsatna awm thin te hi mihringte harsatna a ni, a ti a, an sorkar tirh atanga Mizoramah education siam that an duh avangin India rama a pahnihna ni turin Education Reforms Commission din anih thu sawiin, Pu Lal Thanhawla chuan a report thehluhte pawh hman dan tur leh hman theih dan ngaihtuah mek a ni, a ti a. Zirlai naupangin zirna tha an dawnna turin zirtirtu chu trained chhuak ngei an nih a ngai a ni, a ti.

Governing Body meeting-ah hian thurel tur agenda paruk chhawpchhuah a ni a. Heng zingah hian meeting neih hnuhnung bera an thurelte bawhzui a nih dante sawiho a ni a, kum 2010 - 2013 chhunga SSA leh RMSA hmasawnna te leh a hlawhtlinna te leh kum 2013 - 2014 chhunga an hmalak tur chhawpchhuahte an sawiho a ni.

Meeting-ah hian SSA din tirh kum 2001 atanga 2013 - 2014 thlenga sum hmuh tawh chu cheng nuai 78519.60 a ni tih tarlan a ni a; Primary leh Upper Primary School building thar 561 sak tawhte, Block Resource Centre 26 leh Cluster Resource Centre 171, hmeichhe hostel 9 leh residential hostel 2 sak zawh tawh anih thute tarlan anih bakah hmasawnna ruhrel infrastructure hrang hrang thahnemtak siam a nih thu leh hnathawktu hrang hrang mi 4658 an awm thute tarlan a ni a. RMSA din tirh kum 2009 atanga kum 2013 - 2014 thlenga sum hmuh tawh pawh cheng nuai 15866. 25 anih thu tarlan a ni bawk a. Secondary school thar 81 kallai mek awm bawkin, hnathawktu hrang hrang mi 920 an awm mek thu tarlan a ni bawk.