Lunglei Distritct Football Association in an District huamchhung atanga ram pum huap football khel thiam thlan chhuah leh Lunglei XI Charity Football match an buatsaih atanga sum an hmuh cheng 55,000 leh MFA Headquarters, Aizawlin cheng 45,000 a tum, a vaiin cheng nuai 1 chu tun hnaia Laipuitlang leh Ramhlun Venglaia chhiat tawk te tanpui nan MFA President Pu Lal Thanzara chuan Central YMA President Pu T Sangkunga hnenah vawiin khan a hlan.

Parliamentary Secretary to Chief Minister Pu Lal Thanzara office-a inhlanna hun tawite buatsaihah hian MFA President ni bawk chuan chhiat tawk te tanpui nan MFA chuan Charity Football Match buatsaih a tum laiin khelmual chung chang lamah te engemaw rokhawlhna a awm laia Lunglei DFA in hlawhtling taka an lo buatsaih thei chu lawmawm a ti a. Heta an sum tlingkhawm belhchhaha MFA-in remchang a lak ve tak dan a sawifiah a ni. Football hi Mizo thalaite nun kaihruaitu thil tangkai tak a nih thu leh theihtawp chhuaha hmalam pan tura tan lak zel an tum dan te pawh a sawi lang bawk.

Central YMA President Pu T Sangkunga chuan vawiin thlenga tanpuina thawhlawm CYMA kuta lut tawh zat chu cheng nuai sawmriat pathum leh sangruk (Rs 83,06,000) a ni tiin hetiang zat thawh lawm tura Zoram pum kohhran hrang hrang, tlawmngai pawl, thian ho leh mimal thahnemngai te inpeknaah lawmthu a sawi a. Chhiat tawh chu thil lungchhiatthlak tak ni mah se thawhhona leh tanpui ngai te tanpui duhna thinlung a taka lantir hmuh tur awm erawh vanduai-a-chunga-malsawmna a ni, a ti.