Social Welfare Department hnuaia District Child Protection Society/Unit te hi Lunglei-ah kum 2012 atanga din tawh a ni a. Sorkar laipui hnuaia Ministry of Women & Child Development-in naupang chanvo humhim leh an hamthatna tur a ruahman sak chi hrang hrang lama hma la turin he Society/Unit hi din a ni.

Naupang te dikna leh chanvo humhalh sakna Dan ‘Child Rights and The Juvenile Justice (Care and Protecion of Children) Act 2000’ bawhzuiin rampumah Integrated Child Protection Scheme (ICPS) kalpui mek a ni a. Mizoramah pawh kum 2010-11 atang khan hmalak tan a ni a, naupang harsatna tawkte dikna chanvo humhim saka tha tak leh awmze nei taka an lo thanlen theihna atana hmun him leh boruak muanawm siamsak hi ICPS thil tum pawimawh tak a ni. Juvenile Justice (Care and Protecion of Children) (Amendment) Act 2006-in naupang a tih chu nausen piang hlim atanga kum 18 la pumhlum lo chin te an ni.

Naupangte hian dikna chanvo (rights) chi hrang hrang an nei a.Indiaram Danpui (Constitution)-ah leh a bika naupang humhalh leh venhimna atan Dan chi hrang hrang a awm bawk. JJ Act 2000-in naupang dikna chanvo a tarlan pali te chu :

1). Nun khawchhuah theihna chanvo (Right to Survival)

2). Hmasawn thei tura chanvo (Right to Development)

3). Venhimna chanvo (Right to Protection)

4). Ngaihdan leh thutlukna siamna a tel ve theihna chanvo (Right to Participation) a ni.

Naupang tanpui ngaite tan nitin darkar 24 chhungin engtik hunah pawh CHILDLINE Phone No.1098 (toll free) ah man chawi ngai lovin an harsatna thlenin biak theih a ni. BSNL (landline leh mobile) leh Aircel atanga biak theih a ni.