Mizoram sawrkara Planning & Programme Implementation Department hnuaia Entrepreneurship Development Centre (EDC) leh Lunglei Government College (LGC) tangkawp buatsaih, ni hnih awh tur "Innovative Challenge on Business Solution to Sustainable Development Goals" tih thupui hmanga thalaite zirtirna leh inelna chu vawiin atangin LGC RUSA Multipurpose Hall-ah neih tan a ni. He hunah hian Department official-te, judge tura ruat te leh Lunglei khawpui chhunga college Zirtirtu leh zirlai thahnem tak an tel a ni.

Vawiin program Pu LH Rothanga, Principal, LGC kaihhruaiah Adviser cum Jt Secretary, Planning and Programme Implementation Department Dr Lalrinchhana chuan Kick Off na hun a hmang a. Innovative Challenge - in a tum bulpui ber chu ram hmasawnna lam vei tura thalaite rilru a tha zawnga kaihhruai leh mahni kutkawih ngeia ding chhuak thei tura thalaite fuih a ni, a ti a. Khawtlang harsatna sut kianna tur leh ram hmasawnna tur ni si, sumdawnna hma thar lakna tur rawtna tha tak zirlaiten an rawn neih theih ngei a beisei thu sawiin duhsakna a hlan a ni.

He Innovative Challenge-ah hian a ni khatnaah hmasawnna ngelnghet leh rualkhai nei tura hmathlir (Sustainable Development Goal) hnuaia goal 17 awm chhunga harsatnate behchhanin a telte'n harsatna an ngaih pawimawh zawng minute 3 chhung an sawi theihna hun hawn a ni a. Endiktu (judge)-te'n chu'ng zinga harsatna (problem) tlinga an hriat thlang chhuakin, problem neitute chu team leader an ni nghal a. Team leader-te hnuaiah hian a tel zawng zawng chu team hrang hrangah inthen darhin, an team leader-in harsatna a chhawp chhuah chu ching fel tura mimalin sumdawnnaa an chantir theih dan an sawi ho leh ang a. A chin fel dan tur an ruahman chu ni hnihnaah minit 10 chhung judge-te hmaah sawi fiah lehin, chumi atang chuan result siam a ni ang.

He Innovative Challenge-ah hian a ti tha ber team-in Rs 30,000/- dawngin, pahnihnain Rs 20,000/- leh pathumnain Rs 10,000/- an dawng dawn a. A tel zawng zawngin participation certificate leh pawisa fai an dawng theuh bawk ang.
Entrepreneurship Development Centre hi Mizoram sawrkar Planning and Programme Implementation Department ruahmanna, Entrepreneurship Development Scheme hnuaia awm niin, Mizoramin entrepreneurship lama hma a sawn theih nana hma latu a ni a. Tun tumah hian district zawng zawng tuam chhuakin district-a college-te nen tang kawpin he Innovative Challenge hi an buatsaih a. Zirlaite kawng kawhhmuhin, notebook, t-shirt leh pen te a thlawnin an sem bawk.

EDC District Innovative Challenge-a judge te hi Pu C. Vanlalmuana, Chief Planning Officer HPC Lunglei, Pu C. Zairemthanga, HOD Economics Department, LGC, Pi Agnes L Khawlhring, Associate Professor LGC, Pi C. Lalremruati, DIPRO Lunglei leh Pi Lalthianghlimi, Branch Manager, NEDFi Lunglei te an ni.