Nimin chawhnu khan DC Conference Hall, Lunglei ah Deputy Commissioner leh Chairman, IAPPD Lunglei District ni bawk Pi Lalzarmawii, IAS kaihhruaina in District Level Convergence Meeting on Integrated Action Plan for Pneumonia and Diarrhoea (IAPPD) leh India New Born Action Plan (INAP) chungchang sawi hona meeting neih a ni.

Pi Lalzarmawii chuan thu sawiin khawvel pumpui a naupang kum 5 hnuai lam thi te zinga 29% chu awmna leh kawthalo (pneumonia leh diarrhoea) vanga thi an ni tiin India ram ah pawh heng natna avangin naupang thi an tam thin hle  a ni, a ti a. Kum 2013 khan UNICEF in awmna leh kawthalo vanga naupang kum 5 hnuai lam thi an tlem theih nan Action Plan a duang a, India ram ah pawh he action plan hi kalpui mek  a ni a, Mizoram ah pawh heng natna tih tlem theih nan Health Department bakah Social Welfare Department., PHE, PWD, Enviroment & Forest, Rural Development, UD&PA, I&PR, Education Department leh LAD bakah NGO leh kohhran hrang hrangte nena thawk hova hmala turin District Action Plan siam a ngaih thu a sawi a ni. Heng natna te do tur hian Department hrang hrang te thawh hona tha tak neih a tul a ni tiin Pi Lalzarmawii chuan District Hrisel ber ni turin tan I la ang u, a ti bawk.

Dr VLMS Dawngliana, CMO, Lunglei pawhin thusawiin Health department chauh in awmna leh kawthalo natna te hi a ti rem thei lova, Line  Department te hian pawimawhna an nei theuh a, thawhhona tha tak nen a kalpui a District Action Plan tha neih theihna turin tha tak leh hlawhtling tak a kan tih a ngai a ni, a ti. Dr. Lalrintluangi, SMO in awmna leh kawthalo laka invenna atan a  Action Plan siam te sawifiahna a nei bawk a ni.

Nimin meeting-ah hian Line Department hotute leh Lunglei District MJA hruaitute bakah tlawmngai pawl aiawhte an kal tha hle a. Lunglei District MJA President Pu Lianchama Chhangte pawhin thu sawiin hriselna kawnga mipuite hriat tur pawimawh chanchinbu a tih chhuah thin chu Lunglei District huamchhunga journalist-ten an ngai pawimawh a ni tiin, hemi kawnga Health Department mithiamte thurawn la thin turin an in hawng reng a ni tih a tarlang bawk. 

Awmna leh kawthalo do chungchang zirho turin Health & Family Welfare Department, Mizoram chuan State Level Consultative Workshop on Integrated Action Plan for Pneumonia & Diarrhoea (IAPPD) &  India New Born Action Plan (INAP) 31^st August – 1^st September 2017 hian State Guest House, Chaltlang-ah a buatsaih dawn a, Lunglei District-a Line Department hotute pawh tel tura hriattir an ni bawk.