2021/2022-2023
Lunglei the 22nd September' 2022: Vawiin khan Convention Centre, Lunglei ah District Level Training On RTI Act, 2005 hun hman a ni. Pu Lalnunmawia Chuaungo, IAS (Rtd) Chief Information Commissioner, Mizoram Information Commission chuan khuallian niin a hmanpui. He hun ah hian Lunglei District huamchhunga DAA, SAPIO leh SPIO te an tel a ni.

Training On RTI Act, 2005 hun hi Pu Donny Lalruatsanga, Addl. Deputy Commissioner, Lunglei chuan kaihruaiin khuallian Pu Lalnunmawia Chuaungo chuan mipuite rorelna sawrkar (Democracy) leh RTI chu thil kal kawp tlat a ni tiin sawrkar hmalakna leh hnathawhte hriat chu khua leh tuite chanvo a ni, a ti a. RTI Act hi ramchhung state dangte aiin Mizoram ah kan la hmang tlem hle a ni tiin he dan chungchang hi mipuite zingah inhrilhfiah a tul takzet a, a tangkai tur anga mipuiten an chhawr thiam theih nan inzirtirna chak tak kalpui chhoh zel a tul a ni a ti. Suo Moto Disclosure under Section 4 ngaih pawimawh a tul thu sawiin Department website ah te Department hmalakna hrang hrang te mipui hmuh theih tura chhawp chhuak thin turin a chah a ni. Mizoram Information Commission ah zualkona a thlen tlem thu sawiin SPIO ten an tih tur tha taka tiin hun tiam chhungin information an pek chhuah theih thin avang a ni, a ti a. SAPIO leh SPIO te chu an mawhphurna pawimawhzia hria in tha taka RTI zawhna te chhang thin turin leh he Dan kenkawh kawnga an hriat fiah duh te pawh Mizoram Information Commission ah zawt hreh lo turin a chah a.

Pu Kulothungan A, IAS Deputy Commissioner Lunglei chuan kalkhawmte lawmna thu sawiin Lunglei District Level Training On RTI Act, 2005 zirna a Chief Information Commissioner, MIC a lo tel thei chu lawmawm a tih thu a sawi a, RTI Act chu sorkar langtlang leh mawhphurna hlen thei awm theihna tur a ni tiin dan tha tak hi hmang tangkai tur leh a nih dan tur taka hmangtur chuan a hman dan tur kal hmang chiang taka hriat theuh a tul a ni a ti. RTI Act hmanga zawhna dawngtu department te pawhin RTI Act dah pawimawhin a hun bituk chhung ngeia zawhna chhang thin turin training a tel te a chah a ni.

District Resource Person pahnih Pi C. Lalremruati, DIPRO in RTI Act & Rules, Obligation of Public Authorities; RTI Online, Mizoram leh Pu Thara Lungtau, Joint Director, Account & Treasuries, Southern Zone in Appeals and Penalties under RTI Act tih thupui hmangin zirtirna an pe a ni. Zawhna leh chhanna hun hman a ni bawk.