Mizoram Rural Bank, Lunglei District huaihawtin vawiin khan Saikuti Hall, Lunglei-ah ‘e-Payment Literacy Workshop’ neih a ni a, he hunah hian DDM, NABARD Pu Lalrokunga chu ‘Special Guest’ niin MRB General Manager Pu Golap Basumatari, Lead Bank Chief Manager Pu James L.H. Pachuau bakah National Payments Corporation of India (NPCI), Mumbai atangin Pu Souraph Tomar ten Workshop hi an rawn hmanpui.

Workshop hawnnaah MRB hotupa Pu Golap Basumatari chuan tunlai technology thiamna khawvelah e-payment hmangin mipuite chuan awlsam zawka bank an dawr theih tawh tur thu leh an sum tichevel pawh bank-ah kal kher ngai lovin mahni awmna hmunah computer/laptop/smartphone hmangin an ti vek thei dawn a ni, a ti. Rampumah ‘Digital India’ kalpui mek a ni a, electronic khawvelahkanluh mek avangin mipuiten e-payment chungchang an hriatthiam a pawimawh takzet a; vawiina MRB-in mipuite tan hetiang workshopkanhuaihawt thei hi a vanneihthlak hle a ni, a ti bawk.

Vawiin Workshop-a Special Guest DDM NABARD Pu Lalrokunga pawhin thu sawiin kum 2012 daih tawh khan Sorkar Laipui chuan a hnuaia Ministry/Department leh Peng hrang hrangte chu e-payment hmang vek turin thupek a chhuah tawh thu a tarlang a; Central atanga State hnenah sum pek thin pawh hi e-payment hmanga tih vek tura hriattir an ni tawh a ni, a ti. POS awmna apiang dawrah pawh e-payment hmangin pawisa pek leh lakchhuah a nih theih nan hmalak mek a ni tih a sawi a, e-payment vawi 4 hman hian A4-size paper 1 zel hum ang a ni, a ti bawk. Mipuiten e-payment hman an uar deuh deuh hunah chuan lehkhapuan (paper)siamnana thing leh mau tihchereu pawh a tlem tulh tulh ang a, hei hian environment thleng a siamthat phah dawn a ni, a ti.

NPCI aiawha lo kal Pu Souraph Tomar chuan e-payment chungchang sawizauna leh hrilhfiahna hun a hmang a, electronic banking peng hrang hrang - ATM leh Debit Card, Point of Sale (POS), Immediate Payment Service (IMPS) bakah mipuite fimkhurna tur kawng hrang hrang a sawifiah bawk a ni. NPCI chuan Mizoram kilkhawr ber pawh thleng pha awmchhun Mizoram Rural Bank chu an thlan tawh angin MRB atanga pek chhuah thin ‘Rupay Card’ pawh e-payment tih theih turin tihchangtlun thuai a ni ang tih a tarlang bawk.

Vawiin Workshop-ah hian NPCI buatsaih ‘e-Payments Literacy Manual’ lehkhabu tlangzarh nghal a ni.