International Literacy Day 2015 chu vawiin khan Mamit District Working Committee on Total Literacy Drive leh Adult Education Wing, Directorate of School Education buatsaihin Mamit Chhimveng YMA Hall-ah hman a ni a, Pu Lalnunmawia MPS SP Mamit-in khuallian niin a hmanpui.

He hun Hmanpuitu Khuallian Pu C. Lalnunmawia, SP Mamit chuan India ram mai nilo khawvel pum huap a Programme pawimawh tak mai Mamitah pawh hman a ni chu lawmawm a tih thu a sawi a, India hnampa Mahatma Gandhi khan “Ziak leh chhiar thiam loh hi sual a ni, kan ti bo tur a ni” tiin ziak leh chhiar thiam mitintena kan thiam theihna turin nasa takin hna a lo thawk tawh a ni a ti a, Vawiin ni hi kan chhehvel a ziak leh chhiar la thiam ve lo ten an thiam theihna tura puitu ni tura kan rilru kan pek thar lehzualna ni ni se a duhthu a sawi a. Ziak leh chhiar thiam hi kawng tinrenga hmasawnna a ni a ti.

SSA Mission, Mamit in 2014 a Survey a neih atangin Mamit District ah Puitling ziak leh chhiar thiam lo mi 7819 zet (mipa 2402 leh hmeichhia 5417) an awm tih tarlan a ni a. Tunah hian District Working Committee on Total Literacy Drive hmalakna in a thawh khatna (First Phase) atan Mamit Block huam chhunga khaw 10 ah zirtirtuten ziak leh chhiar zirtirna an kalpui mek a, a hlawhtlinna pawh hmuh chhoh zel a ni tih tarlan bawk a ni.

Mamit District chhiarpui 2011 (Census 2011) a tarlan angin zirna lamah a la hnufual hle a, zirna lama hmasawnna duhawm a awm theih nana hma nasa zawka lak a tul hle tih tarlangin, mitinin kan phak ang tawk leh kan theih ang tawk theuh a zirna lama hmasawnna a awm theih nana tan la tura insawmna neih a ni.

Pu F.B. Liana, Deputy Director (Adult Education) School Education Department chuan Key-note address sawiin International Literacy Day thuchah a chhiar chhuak bawk.

He hunah hian puitling ziak leh chhiar thiam thar thenkhat ten Ziak leh Chhiar thiam an tumna a an hlawhtlinna leh an tangkaipuinate anmahni ngeiin sawina an nei bawk.

International Literacy Day denchhena Mamit Town Inter Branch YMA Volleyball Competition leh Elementary School Level Drawing Competition neih a lawmman semna neih niin, Mamit khawpui chhunga school thlan bikte atangin Special Item hmuhnawm tak entir a ni a, YMA Mamit Sub-Hqrs. Zaipaawl zai leh Mizo Cultural Organisation (MCO) Mamit Hqrs. atang Cheraw hmuhnawm tak entir a ni bawk.

International Literacy Day, 2015 hmannaah hian Mamit a khawtlang hruaitu hrang hrang bakah Zirtirtute leh Class VIII zirlai naupangte an kal tha hle.

International Literacy Day 2015 hmanna hi Pu T.C. Lalremsiama, CAEO chuan lawmthu sawiin hun a khar a ni.