MP (Lok Sabha) Election 2014 atan Lunglei District Sector Officer/Magistrate leh Election kaihhnawih Officials zawng zawngte tan vawiin khan DRDA Conference Hall-ah 'First Level VVPAT Training' neih a ni a. VVPAT siamtu Company Bharat Electronics Ltd.(BEL) atanga lo kal Engineer ten VVPAT remkhawm dan leh hmandan chungchang chipchiar takin an zirtir a ni. VVPAT Training-ah hian General Observer Pu Pu K.Hemaji Nair, IAS pawh a tel ve a ni.

Vawiina training kaihruaitu Lunglei DC/DEO Pu Ashish Madhaorao More chuan Lunglei District huamchhunga ‘Urban Polling Stations’ 45-ah Voter Verifiable Paper Audit Trail (VVPAT) hman tel a ni dawn avangin Presiding/Polling Officers te bakah Sector Officers/ Magistrates te chuan VVPAT hi chiang taka hmelhriat a pawimawh a, VVPAT hmandan tur ECI-in a duan angin uluk leh fimkhur taka kalpui a tul a ni, a ti. Kar lehah Presiding Officers leh Polling Officers te pawh VVPAT training pek vek an nih tur thu a sawi bawk. Voter Verifiable Paper Audit Trail (VVPAT) hi kum 2006 hnua EVM siamte nena inrem tura siam a ni a, 'printer' ang deuha thawkin vote thlak reng rengte chu vote thlaktu hmuh theih turin lehkha-ah a in 'print' chhuak zel a ni (ATM slip ang deuhin). Amaherawhchu he VVPAT slip hi voter-te tan lakchhuah theih a ni lova, a bawm chhungah darthlalang phenah 7 seconds chhung, voter-in a dik leh dik loh an enfiah ve theih turin a inphochhuak chauh dawn a ni.

Voter-in complaint a nei (entir nan : VVPAT Slip-a a vote thlak a in print dik lo tiin sawisel ta se) a nih chuan Presiding Officer hnenah thlenin, voter ngei chuan declaration a sign hnuah Presiding Officer hriatpuinain 'test vote' neih tur a ni ang a; VVPAT chu a dik lo emaw a lo felhlel emaw tak tak a nih chauh chuan vote thlak nawn tir leh a ni ang. Complaint thehluh hnua test vote nei hnuah pawh VVPAT chu felhlelna nei lo emaw dika a lang leh si emaw a nih chuan Danin hrem a phal angin voter complaint diklo/dawt sawi te chu thla 6 chhunga tan tir theih an ni hlauh thung a ni.