Vawiin khan Lunglei DC Pu Abhijit Vijay Chaudhari hovin Lunglei District Fire Prevention Committee chu DC's Conference Hall-ah thukhawmin Mizoram puma February ni 10, 2016 atanga 'Fire Prevention Week' hman tan tur chu Lunglei District chhungah kalpui ve dan tur an rel.

Meeting hawnnaah thuhma sawiin Lunglei DC Pu Abhijit Chaudhari chuan Mizoram-a District 8 zinga titha ber ni turin tanlak nise, sorkar bakah NGO hrang hrang, zirna in leh khawtlang mipuite tangrualin kangmei chhuak lo turin kan bei a ngai a ni, a ti a. District Fire Prevention Committee chuan kumdanga he Week chhunga hmalak tawh dante thlirhovin kuminah pawh he Week hawnna urhsun taka neiin mipuite chu kangmei laka inven pawimawhna hrilhhre turin kawngzawh leh ngei nise tih an rel a. Kumdanga tih thin angin media hrang hrang hmangin uar lehzuala 'Fire Prevention' lam tarlan nise, hemi chungchanga ziak tha chanchinbu 3 te chu thlang chhuakin lawmman siam sak nise tih rel a ni bawk. PHE Department chuan kangmei chhuah thutah heng hmun 5 - Lunglawn, Chanmari, Kikawn, Serkawn leh Zotlang-a an tuizem (water tanky) te chu tikhat tha reng turin hrilh an ni bawk a. Green Mizoram Day puala kawngpui sira thingphun zawng zawngte chu lo hal hunchhungah an thingphunte kangmei laka a him theih nan tan la theuh se, Fire Prevention chungchanga hmalaknaah Sub Hqrs YMA te nen thawhho ngei nise tih an rel bawk a. Fire Prevention Week hawn ni February ni 10, 2016 (Nilaini) zanah local cable TV/DDK/AIR-ah te Lunglei DC Thuchah chhuah nise tih an rel a ni.

Kuminah hian Mizoram sorkar chuan kangmei chhuak tur laka invenna nasa lehzuala kalpui a tum a, kum dang ang bawkin lo hal tur zawng zawngte chu khaw tin Village Council theuhte kaltlangin March ni 15, 2016 hmain hal tura hrilh an ni vek ang a. Kangmei laka invenna zawm tha khuate chu thlanchhuah niin lawmman 1st Prize-50000/-, 2nd Prize-30000/- leh 3rd Prize-20000/- pek an ni ang a, he thupek bawhchhiate erawh chu Dan angin hrem an ni dawn thung a ni.

Mizoram sorkar chuan Fire Prevention Mascot-ah 'Sakhi' (Barking Deer) a thlan angin Fire Prevention lam hawia thuziak leh poster, etc ah te he mascot lem hi a chuang tawh dawn a ni.