Khawlaia inthiar awmlohna tura hmalakna hapta “Freedom from Open Defecation Week” 9th – 15th August, 2017 hawnna inkhawm chu tukin zing dar 7 : 00 khan Mizofed kawtzawl, Lunglei Venglai-ah neih a ni a. Lunglei DC, Pi Lalzarmawii, IAS chuan a hawng. 

Hawnna inkhawmah hian thu sawiin Pi Lalzarmawii chuan Lunglei District chu ualau taka zun leh ek thiar kawnga district fihlim a nih ve thuai theihna turin sawrkarin nasa takin hma lain kumin October thla ah hian Open Defecation Free (ODF) District-a inpuan ve hman ngei kan in beisei a ni, a ti a. Khawtlang faina leh thianghlimna chu mitin te mawhphurhna a ni tiin vawiin hawnna inkhawma tel zawng zawng te chu faina kawnga hmahruaitu leh mite entawntlak ni tura tan la theuh turin a chah a. Swachh Bharat Mission chu Prime Minister’s Flagship Programme anih angin chak taka kalpui chhoh zel a ni dawn, a ti bawk. 

He hawnna inkhawm hi PHE Department, Rural Watsan Division, Swachh Bharat Mission (Gramin) buatsaih niin Pu Alan Lalthalura, Executive Engineer, PHED-in a kaihruai a. Pi F. Lalrindiki, Lunglei District Coordinator, SBM(G) chuan Technical Report pe in Lunglei District chhunga hmalakna tlangpui a tarlang a. Kum 2012-a Baseline Survey report-ah Lunglei District chhungah inthiarna toilet (Individual Household Latrine - IHHL) neilo chhungkaw 9841 an awm a, tun dinhmunah chhungkaw 3281 tan IHHL sak sak an ni tawh a ni. Hemi bakah hian vantlang zun in leh bawlhhlawh sawngbawlna hmun tur buaitsaihna kawngah pawh hmalak chhoh zel a ni. 

Lunglei District chhunga faina lama tlawmngai pawl pawimawh tak Clean Lunglei aiawhin Pu Kawlkunga Kawlni pawhin thu a sawi a. Faina kawnga an hmalak dan te tarlangin Lunglei District ODF a nih theih na tura sawrkar nen tangruala thawhho an tum thu a sawi a. Faina beihpui thlak turin Clean Lunglei chu a inpeih reng a ni tiin hnathlang leh awareness drive an neih thin te pawh chak zawka kalpui chho zel turin ruahmanna an siam thu a sawi bawk. 

He hunah hian Lunglei khawpui chhunga zirlai naupang leh zirtirute thahnem tak an kalkhawm a, “Freedom from Open Defecation Week” pual hian Freedom from Open Defecation March neiin Venglai atanga Bazar Veng thleng kawng an zawh a ni.