Vawiin chawhma dar 10:30 khan Lunglei Town Road Protection Squad chu an Chairman Lunglei DC Pi Lalzarmawii, IAS hovin khawchhung kawng humhalh chungchang sawiho tur leh mipuite an lo him zawk theihna tura hmalak dan tur ngaihtuah turin DC Conference Hall-ah an thukhawm. He meeting-ah hian Lunglei District-a a kaihhnawih tur Department hrang hrang official-te bakah YMA hotute leh veng hrang hrang VCP-te an tel tha hle a ni.

Pi Lalzarmawii chuan kawng humhalh chu sawrkarin a ngai pawimawh takzet a ni tiin kalkhawmte chu hemi chungchanga thawhhona tha tak nei tur leh thurawn te in pe tawn thin turin a chah a.  Lunglei khawchhung a la chep em em loh avangin hlawk takin kawng humhalh hna a kalpui theih dawn a, Lunglei Town Road Protection Squad chu midang te tana entawntlak khawpa hnathawk tha turin tan lak a ngai a ni, a ti. 

Hemi hunah hian Er Lalchhuana, Executive Engineer, PWD Lunglei Road Division pawhin thu sawiin  kawng hi black-top chin chauh ni lo in, a sir a tuiluankawr (side-drain)-te pawh mipuiin an ngaih pawimawh a tul a ni, a ti a. Kawngkama in sa ten nasa takin vantlang kawng an nek thin bakah kawng thlang lam nek chep zawnga tuizem dah leh vawk in sak hi khawpui chhunga hmuh tur a tam hle a ni, a ti a. Tuiluankawr fel tawk loh avangin chhiatna nasa tak a thleng thin a ni tiin heng hmunah rawra leh balu te mipuiin dah mai an ching chu tihtawp a tul a ni, a ti bawk.

Lunglei khawpui chhunga veng hrang hrang khawtlang hruaitu V/C-te pawhin an veng theuha harsatna an tawh te sawiin Road Protection Squad chuan a hmunah enfiahin ‘Spot Verification’ neih ni se an ti a. Committee chuan chu rawtna chu pawmin 18^th August, 2017 – ah inhmukhawm lehin veng hrang hrang a kawngpui chhia, tuiluankawr chhia leh thenfai ngaite leh kawngpui nek chep na hmun te enfiah turin ruahmanna siam ni se tiin thu an rel a ni.