Vawiin khan Convention Centre, Lunglei ah District Legal Service Authority, Lunglei buatsaihin Dan in vantlang nuna nghawng a neih hrang hrangte zirhona “Seminar on Law and Social Change” neih a ni a, Justice Nelson Sailo, Judge, Gauhati High Court chuan khuallian niin a hmanpui.

Seminar inkhawm hi Pu R.Thanga,District Judge leh Chairman District Legal Service Authority, Lunglei nibawk in kaihruaiin kalkhawmte lawmna thu a sawi a.  Justice Nelson Sailo chuan thusawiin India Danpui ah three pillars - Executive,Legislative leh Judiciary an awm a, hemi ah hian Judiciary chu ke pakhat niin a tello hian danpui hi a ding theilo a ni,  a ti a. Dan siamtu chu mipui te thlan lal Legislature an ni a, chuvangin dan siamna ah hian mipui ten chanvo pawimawh tak an nei a ni, a ti bawk. Democracy ram ah chuan dan hmanthiam a tul hle a ni tiin Justice Nelson Sailo chuan Mizo mipuite hi Dan leh hrai hriatna kawngah hmasawn hle mah ila, inzir tur kanla ngah hle a, Dan hnuaiah hriatloh hi chhuanlam tling a  nih loh avangin tute tan pawh inzir thar reng a tul thu leh nitin khawsakna ah pawh Dan hnuaia thil engkima kan tih theihna turin  heti lamah hian tan kan lak a ngai a ni, a ti. Seminar chhimtute chu Dan leh hrai  hi mithiam zawkte zawt hreh lo turin a chah a, dan kengkawh tute zah thiam a, tanpui an ngaihna a tanpui theuh turin a chah bawk.

Pu ZD L. Lianmawia, Public Prosecutor, District Court, Lunglei, Pi Helen Dawngliani, Addl. District & Session Judge cum Special Judge, ND&PS, Lunglei. Prof J Zorema, Principal Govt. J Buana College, Lunglei leh  Pu J. Lalthafamkima, SP, Lunglei ten Dan leh hrai lama thupui thlanchhuah hmangin kalkhawmte zirtirna an pe a. Hemi zawh hian zawhna leh chhanna hun leh sawihona hun hlawhtling tak hman a ni.

District Legal Service Authority, Lunglei buatsaihin Primary School atanga College zirlaite tan Essay Wrinting competition buatsaihah College ah Flora Saizikpuii, I semsester, BSW, HATIM chu ‘Mizoram 2030 My Vision’ tih thupui hmangin pakhatna a ni. Higher Scondary ah ‘Social Media in kan mimal nunah a chhe lam leh tha lama nghawng a neih dan’ tihah H.Hmingthansanga, Class- XI, Christian Education Centre chu pakhatna a ni. High School ah ‘Ruihhlo, Ram leh hnam hmelma’ ah R.Lalrempuii, Class IX, BHSS chu pakhatnna niin Middle Section ah 'Ka mi ngaihsan zawng' tih thupui hmangin Alex Paul Laldintluanga, Class-VII, Sacred Heart School chu pakhatna a ni. Primary Section ah "Kan chhungkua" tih thupui ah Rosangpuii, Class-IV, Model School, Lunglawn chu pakhatna a ni.