Nimin chawhnu khan Pu David L. Thangliana, Joint Director, Information and Public Relations Department chuan Mizoram sawrkarin Accredited Journalist boral te a ralna Rs. 150000 (nuai khat leh singnga) chu; kumin March ni 31 a Accredited Journalist boral ta Pu PC Zonunsanga, Editor, Thenzawl Today kalsan tak a nupui Pi Hmangaihzuali hnenah a hlan.

He ralna hun hi Pu PC Zonunsanga (L) te chenna in, Thenzawla neihah hian Pu David L. Thangliana chuan, Mizoram sawrkar chu chanchinbumite ngaihsak tak; an pawimawhna leh ram hmasawnna tura tha an thawh theih zia hrechiangtu a ni a. Anmahni enkawl turin Mizoram Journalist Welfare Society dinin Information and Public Relations Department Secretary Chairman na hnuaiah Governing Body a din sak a. Journalist leh an chhungkaw zinga damlohna khirhkhan tawk te chhawmdawlna te, Journalist boral ralna te ruahman sakin sawrkar in an pualin budget te a siam a ni, a ti a. Pu PC Zonunsanga boralna chu Thenzawl khaw tan channa lian tak nia a hriat thu leh ram tan pawha uiawm a tlin thu sawiin, a nupui fanaute a tawrhpui tak zet thu a sawi a. Mimal tak pawha a thian tha a nihna te hrerengin amah ngei kala he ralna hi hlan a nih thu a sawi.

He hunah hian Pu C. Lalhminghlua, President, MJA Serchhip District, pawhin thu sawiin Pu PC Zonunsanga chu Serchhip MJA te uaptu, member dangten u ena kan en, district chhung hmasawnna leh vantlang nunkawng thatna sawina apianga Thenzawl khaw tana ding thin, mi entawn tlak tak a ni a ti a. Ani a awm loh meuh chuan Serchhip MJA te khua a har tak zet a ni, a ti.

Ralna inkhawm tawi hi Pu K. Saitluanga, DIPRO Serchhip in a kaihruaia, Pu Andrew H. Lalremruata, Media Officer leh I&PR Media Cell a thawk official pawimawh te, Serchhip District MJA member thahnem tak leh Pu J. Malsawmzuala, DDK ten he hun hi an hmanpui a ni.