Pu R. Romawia, Art & Culture Minister chuan vawiin khan Mizo Writers Association ten an Ruby Jubilee (Kum 40-na) lawm leh thu leh hla kutpui Central YMA Hall, Tuikhuahtlang a an neih a hmanpui. Inkhawm hi Pu B. Lalthangliana, Vice President, MWA in a kaihruai a. Minister hian Pu R.K. Lalhluna, Lunglawn, Lunglei hnenah 2017 Mizo Literary Award a hlan a, Jubilee Souvenir a tlangzarh nghal a ni.

Minister chuan Mizo Writers Association in kum 40 an lo tling ta chu lawmawm a tiin an ni hi Mizo te thu leh hla lama hmasawnna tura hma nasa taka la tute niin Art & Culture Department te nen an tan hona tha a tih thu a sawi a. Mizo te thu leh hla lama hma kan sawn zelna tur leh Mizotawng dik tak hmang tura inzirtir tur leh humhim zel thei tura hmala a, theih tawp chhuah zel turin a chah a, hma an lak tawhna zawng zawngah an fakawmin an chhuanawm hle a ni, a ti. Thu leh hla hi hnam zia a bet tlat a ni a, thangthar ten  thu leh hla atang hian hmanlai thil, hnamzia rang te an hriat reng phah a ni, a ti bawk.

Vawiin hian ‘Van ramah Minute 90 chhung’ tih lehkhabu letlingtu Pu Zothanmawia Khiangte hnenah Translation Book Award 2016  hlan a ni a. Class X, Class XII, BA leh MA a Mizo Subject a ti tha te hnenah Mizo Proficiency Prize hlan an ni bawk.

MWA hi July 23, 1977 khan din a ni a. An pawl thil tum leh dinchhan te chu : Lehkhabu ziaktute hmasawnna kawng zawn; Thu leh hla lama Mizo Pi/Pute thil hlu chhawm thlakte humhalh leh tih hmasawn; Lehkha thiamna lam (Literature) tha leh hman tlak tam zawk neih; Mizo tawng hi University thlenga zirlai (subject) pakhat nitlak a siam; Thiamna lama hmasawnna tur leh lehkhabu chhuah chungchang, sawrkar hnena thurawn pek te an ni.