Vawiin chawhma khan Commerce and Industries Department buatsaihin Mamuana Memorial Hall, Electric Veng, Champhai-ah NLUP 3^rd Phase ( Final Instalment),4^th Phase (Second Instalment) leh NLUP-NEDP Convergence ( First Instalment) Champhai South Cluster huamchhunga  beneficiary-te hnenah tanpuina sem a ni a. He hunah hian  Champhai South bialtu MLA Pu J.H Rothuama, NLUP Implementing Board (NIB) Chairman nibawk chu khuallian niin  tanpuina sum a sem a ni. 

Pu JH Rothuama chuan NLUP chu Sawrkar flagship programme tawp san mai lova chhunzawm zel  tur anih thu a sawi a. Kumin chhung ngeiin Third and Fourth Phase-te chu sem  zawh hman hram tum a ni, a ti a. NLUP chu uluk taka zirchian leh inzirtirnate neih anih hnuah  kalpui a nih thu sawiin hei hian eirukna leh sum put ralna a veng a ni,a ti bawk. NLUP vanga hmuh theiha hlawhtlinna hrang hrang awm chu lawmawm a ti a. Kuhva leh Rubber lama hmasawnna Kolasib leh Mamit District lama a awm thu leh chhim lam thlenga hmalak zel tum a ni,a ti a. Kuhva chingtute tan tun hnaiah Kuhva Scoup-na tur Bilkhawthlira hawn anih thu tarlangin hetiang ang bawk hi Kawrthah tlang dung lamah pawh hawn tuma ruahmanna siam anih thu a sawi a. Mirethei leh chhumchhia ten leirem an rah theihna tur leh eizawnna ngelnghet tu leh fate thlenga ro chun theih tur an neih theih nana buatsaih hi NLUP tum ber a ni, NIB Chairman chuan a ti a. Kalkhawmte chu mahni trade thlan theuhah taima leh rinawm taka thawka intodelh tum theuh turin a chah nghal a ni.

NLUP semna inkhawm hi Pu R.Laltanzuala, Functional Manager, District Industries Centre (DIC) Champhaiin a kaihruai a. Pu Lalremthanga, Skill Worker-in report tlangpui pein kalkhawmte hriattur tulte a sawi a. Pi Lalthangveli DIC Staff-in lawmthu sawiin hun a khar a ni. 

Commerce and Industries hnuaia ah hian NLUP trade chi hrang hrang 10-ah beneficiary 189-te hnenah cheng nuai sawmruk pasarih sing thum sang kua zathum sawm hnih pakua (Rs 67,39,329/-) sem a ni a. NLUP-NEDP Convergence hnuaia trade 3-a Beneficiary 17 te hnenah Cheng nuai riat sing nga (Rs 8,50,000/-) sem a ni bawk.

Vawiina NLUP tanpuina sem chhuah takah hian 3^rd Phase Final Instalment hnuaia Trade hrang hrang 13 dawngtu Beneficiary mi 130 te hnenah cheng nuai 38.12 sem a ni a. Fourth Phase Second Instalment hnuaia Trade hrang hrang 12 dawngtu Beneficiary mi 59 te hnenah cheng nuai 29.27 sem niin NLUP-NEDP Convergence hnuaia Trade hrang hrang 3 dawngtu Beneficiary mi 17 te hnenah cheng nuai 8.5 sem chhuah a ni bawk. Vawiina NLUP leh NLUP-NEDP Convergence hnuaia tanpuina  dawngtu Beneficiary mi 206 hnena sem chhuah  hi avaiin cheng nuai 75.89 a ni. NLUP-NEDP Convergence hnuaia tanpuina hi pawisa faia sem a ni a, NLUP hnuaia tanpuina sum hi Direct Benefit Transfer hmangin   Beneficiary-te Bank Account theuhah thun a ni.