Vawiin khan Lunglei DC’s Conference Hall-ah Lunglei District Fire Prevention Committee leh Green Mizoram Committee joint meeting neih a ni a. Addl Dc Pu H.Lianzela chuan meeting kaihruaiin kumin lo hal avanga ramkang/kangmei chhuak chungchang thlirletna leh Green Mizoram Day hman dan tur rel a ni bawk.

Fire Prevention chungchang sawihonaah chuan Lunglei District chhungah ram ti kang miah lo khua titha engemawzat awm laii hmun kang 48 lai a awm chu pawi tih thu leh Village Council & YMA te nena thawhhona chak zawk siama ramkang/kangmei ven hna thawh zel nise tih an rel a. Fire prevention chungchang mipuite hrilhhriatna kawngah media-te an thawk tha hle a, an chungah pawh Committee-in lawmthu a sawi a ni.

Kum dang ang bawkin tun thla June ni 11 khi Mizoram pumah ‘Green Mizoram Day’ atana hman tur a ni a. Lunglei-ah pawh he Ni hi uar taka hman ngei nise, sorkar department te bakah zirna in leh NGO hrang hrang ten thingphun hnatlang an nei dawn a ni. Kumin ‘Green Mizoram Day’ hawnna inkhawm chu Pukpui Centenary Park-ah neih a ni ang a, Lunglei HPC Vice-Chairman Pu S.Laldingliana chu Khuallian tura beisei a ni ang. He Ni-ah hian Fire prevention lama thawk tha khuate bakah fire prevention chungchang ziak tha chanchinbu thlanchhuahte puan an ni ang a, lawmman hlan a ni nghal bawk ang.

‘Green Mizoram Day’ hi state pum huapin ni 18 June, 1998 khan hman hmasak ber a ni a, umin hi a vawi 16-na a ni dawn a. Kumin thupui atan ‘I dam khawchhuah nan thing phun rawh’ tih vuah a ni a, Green Mizoram Logo thar pawh he ni-ah hian tlangzarh a ni tum a ni.