Vawiin khan Champhai DC Pu H. Lalengmawia hovin DC Conference Hall-ah Champhai District chhunga Biometric Enrollment kalpui mek thlen chin leh hmalak dan tur ngaihtuahin meeting neih a ni a. He hunah hian Addl. DC Pu R. Vanlalsawta; Pu Lalhmingthanga, Deputy Director, Census;  Pu S. Das, Technical Manager, ECIL; Pi Lalhruaitluangi, SDC leh Champhai District Nodal Officer ni bawk; Champhai District chhunga BDO-te, Charge Officer-te leh LYRA Consultancy aiawhte an tel a ni.

Champhai DC chuan Sorkar laipuiin National Population Register hnuaia Biometric Enrollment 2nd Round chu tun thla June, 2015 tawp hian zo tawh tura a phut thu leh, 2nd Round-ah hian mipui 90% (kum 5 chin chunglam) chu an in register tawh tur a nih thu a tarlang a. Hemi tihlawhtling tur hian Champhai District-a mawhphurtute zawng chu tan la tura a beisei thu sawiin, registration hna kalpuitu ber contractor LYRA Consultancy Service thawktute chu District Administration lamin a theihtawp a chhuahpui tur thu a sawi a. India ram pum huap hmalakna pawimawh tak a nih avangin Biometric Enrollment hi a ngaih pawimawh thu tarlangin, Operator-ten an thlenchin leh harsatna an tawh palh emaw inhriatpui theih nan Nodal Offcer bulah te, BDO-ah te leh DC hnenah emaw a remchan danin report tha taka an pek a pawimawh thu DC chuan a sawi bawk.

Thawktu indaihloh bakah electric supply mumal loh vang te, inkalpawhna that tawk loh vangte leh thil dang hrang hrang vangin an duhthusam angin contractor company hian hna an thawh that theihloh thu an tarlang a. Enrollment 2nd Round kalpui tur hian thawk tur operator pek belh an nih tur thu ECIL leh LYRA lam chuan sawiin, Enrollment hi tan thuai tura beisei a ni.

Tun dinhmunah hian Champhai District-a Biometric Enrollment la kalpui lohna (1st Round) hi LYRA Consultancy report-a a lan danin khua 30 a la awm a. Ti hian ECIL Report-ah chuan Champhai District-a Biometric Enrollment ti zat chu 38.74% ni tawhin, Mizoram pumah 38.1% a ni. January ni 30 atanga May ni 31, 2015 chhung khan Champhai Disrict Hqtr.-a Permanent Enrollment Centre a thla lak zat chu mi 655 niin, Champhai RD Block-ah chuan mi 885 an ni.