Vawiin khan Mizoram hmun dangte rualin Lunglei-ah pawh ‘Green Mizoram Day 2015’ hman a ni a, a hawnna inkhawm Pukpui Centenary Park-a neihah Pu S.Laldingliana, Vice-Chairman, Lunglei HPC chu Khuallian niin Lunglei DC leh Chairman, Lunglei District Green Mizoram Committee ni bawk Pu Ashish Madhaorao More-in inkhawm a kaihruai a ni.

Green Mizoram Day 2015 hawnnaah Pu S.Laldingliana chuan thangthar lo awm zel turte tan khawvel nuam leh chenna tlak siam hi vawiina damte mawhphurhna a ni a, thingphun uar leh environment humhalh kawngah sorkar hmalakna piah lamah zirna in, kohhran leh NGO ang pawhin tanlak a tul a ni, a ti. Mizote chu pipu atangin environment lamah kan hniam a, sapel nuam ti hnam, ram tichereu zawnga lonei thang kan ni a, chumi nghawng chu ramin a tuar mek a, amaherawhchu a tlai luat hmain kan harhchhuak a, thingphun uar tharin, kan ramngaw, thing leh mau te humhalha duat nachang kan hre chho ta chu a lawmawm hle a ni, a ti bawk. Sorkar hmalakna NLUP pawhin a tum ber pakhat chu ram hman dan thar a ni a, NLUP hnuaiah chhungtin ten ram nghet hmun neia eizawng turin an inbuatsaih chho mek a ni, a ti a. Lunglei District chhungah pawh sorkar department te, NGO hrang hrangte leh MJA ten thing leh mau humhalh kawngah leh mipuite environment chungchanga zirtirna pek lamah an thawh hlawk hle thin chu a lawmawm takzet a ni tiin Pu S.Laldingliana chuan lawmthu a sawi bawk a ni.

Hawnna inkhawm kaihruaitu Lunglei DC Pu Ashish More pawhin thusawiin kumin Green Mizoram Day thupui ‘I dam khawchhuah nan thing phun rawh’ tih chu kan nitin nun atan a pawimawh hle a, khawvel puma mihring cheng zawng zawngte dam khawchhuah nan thingphun tam leh ramngaw humhalh that hi a tul a ni, a ti a. Vawiin Green Mizoram Day hawnna inkhawmah MJA Lunglei President Pu K.Lalrinpuia leh YMA Sub-Hqrs President Pu R.Lalnunthara te pawhin thu sawiin environment humhalh kawnga sorkar hmalakna chu phur tak an thlawp zel tur thu an sawi bawk.

DFO Lunglei leh Member-Secretary, Lunglei District Green Mizoram Committee ni bawk Pu H.Lianmawia-in a Report-a a tarlan danah nikum Lunglei-a Green Mizoram Day hmanah khan department/pawl (planting agency) 64 zetin thing an phun a, thingphun sa 1014 awmin thing phun thar 268 a ni a, nikum lam aiin kuminah he Ni puala thingphun hnatlang an tam zawk thu leh pawl tinin thing 10 theuh an phun belh ang a ni. Kumin March ni 13 khan lo/leipui hal avanga thingphun kangte chu enfiah vek a ni a, tui te pein hung that vek a nih thu a tarlang bawk a, kawngpui bul vattute chu fimkhur turin lehkha pek vek an ni tih a sawi bawk.

Green Mizoram Day 2015 pualin Lunglei District huamchhunga environment awarenese leh fire prevention lama tithate hnenah lawmman sem nghal a ni a, a hnuaia mi ang hi lawmman dawngtute chu an ni :

 1. Best Planting Agency : -

i). Thingphun enkawl tha :

1st - UD&PA

2nd - BDO, Lunglei

3rd - Soil & Water Conservation

ii). Thingphun puitling tawh enkawl tha :

1st - Superintendent, Excise & Narcotics

2nd - EE, Water Supply Maintenance Division Office

3rd - All India Radio, Lunglei

2. Fire prevention chungchang ziak tha ber chanchinbute :

1st - Zochhiar

2nd - Daifim

3rd - Hnamdamna

3. Village level-a fire prevention lama ti tha berte :

1. Hmuntlang (Citation + Rs.50,000)

2. Lungleng ‘S’ (Citation + Rs.30,000)

3. Tawipui ‘S’ (Citation + Rs.20,000)

Vawiin Green Mizoram Day-ah hian Lunglei District-a sorkar office zawng zawng bakah NGO hrang hrang ten thingphun hnatlang leh thing phun tawh sa hmun samfai hnatlang an nei nghal a ni.