Vawiin khan Lawngtlaiah Green Mizoram Day 2015 chu hman a ni a, a hawnna inkhawm DC Conference Hall a neih a nih hnuah khawpui chhungah leh Mampui lam kawngpui kamah thingphun hnatlang neih chhunzawm a ni.

A hawnna inkhawmah khuallian, Pu R. Lalsangluaia, Addl. DC chuan vawiina miten khawvela boruak thianghlim leh thing leh maute hi chen da vek ila, naktuka kan tu leh faten engtin nge nunkhua an rawn sual chhuah ve tak ang? tih hi zawhna nung reng a ni a, chu chu thiltihin kan chhan a tul a ni a ti, thingphun hnatlang nei tura kal khawm sawrkar hnathawk hote chungah lawmthu a sawi bawk.

A hawnna inkhawm hi Lawngtlai DCF (WL) Pu PC Lalchhandama’n a kaihruaia, Lawngtlai District a Green Mizoram Day atanga nikum, 2014 thlenga hmalak dan report tlangpui a tarlanga, kum 2014 thleng khan thing tiak 16754 phun tawh niin dam khawchhuak 7905 an awm a ni.

A hawnna inkhawmah hian LADC EM, Forest Department changtu Pu H. Chhuanawma pawhin thu sawiin, kan thingphun theuhte dam khawchhuah tir ngei tura tan lak a pawimawh zia a tarlang a ni.

Kumina kangmei venhim kawnga titha thlan chhuah khua pathumte hnenah lawmman Certificate leh pawisa fai hlan an ni a, pakhatna hi Rulkual khuaten an dawnga, pahnihna chu Siachangkawn khua niin pathumna lawmman hi Vawmbuk khuaten an dawng a ni.

Hemi hnu hian Department hrang hrang, tlawmngai pawlte leh MJA te hnenah thing tiak phun tur 430 sem zui a ni a, khawpui chhunga phunna tur thlanchhuahah te, Greater Lawngtlai Water Supply Project kawngah te, Lawngtlai atanga khawthlang lam panna kawngpui, Lawngtlai leh Mampui inkarah te phunin an hnatlang zui nghal a ni, a phuntute hian hung nghal tur leh enkawl chhunzawm theuh tura beisei an ni.