Mizoram hmun dang rualin tukin zing khan Champhaiah chuan District Level Committee on Green Mizoram in a lo rel tawh angin CHANEM building kawtah Green Mizoram Day vawi 16-na hawnna inkhawm neih a ni. He hunah hian Pu C.C Lalchuangkima, Project Director, DRDA chu khuallian niin, he ni puala thingphun tura thawkchhuakte chu a vai liam a. Khuallian leh Champhai SP Pu RP Meena ten Green Mizoram Day den chhena chawimawina dawng tura thlan te hnenah lawmpuina an hlan bawk.

Pu C.C Lalchuangkima chuan thingphun uar mai bakah tuna ding sa te hi enkawl leh humhalh nachang hriat a pawimawh thu a sawi a. Kumin thupui thlan – ‘I dam khawchhuah nan thing phun rawh’ tih chuan kan nunna mai bakah awm nawmsakna atan thingkung leh ramngaw pawimawhzia a tarlan thu sawiin, hnam puitling apiangin ramngaw humhalh nachang an hria a ni, a ti.

Vawiin hunah hian kum 2014-2015 chhunga ram ti kang lo khua 5 te hnenah lawmman sem a ni a. Chungte chu Lungtan, Vangchhia, Buang, Riangtlei leh Vantlang te an ni. Luntan khua hian kum 11 chhung ram an tikang tawhlo a, Vangchhia leh Buang hian kum 6 chhhung ve ve ram kang an lo dang tawh a, Riangtlei leh Vantlang hian kum 5 chhung ram an lo ti kang tawhlo bawk.

Thingphun kawnga Champhai tan a thawhhlawk em avangin vawiin hunah hian Pi Lalrammawii, Lecturer, Govt. GM Higher Secondary School hnenah Special Award hlan a ni a. Champhai khaw chhungah thing thahnem tak a phun tawh bakah a humhalh leh enkawlna kawngah te mahni tha leh sum sengin hma a lak that avanga he chawimawina dawng tur hian thlan a ni.

Green Mizoram Day hawnna inkhawm hi Pu Vanlalchuailova, DFO Champhai chuan kaihruaiin, Pu PC Laltanpuia, ACF chuan lawmthu sawina hun a hmang a. Zirlaite leh Sorkar hnathawkte an tel tha hle a. Hmun hrang hrang 11-ah Sorkar Department-te bakah tlawmngai pawl hrang hrang leh School leh College zirlaiten thawkchhuakin thing tiak 1000 chuang phun a ni. Thing phun mai bakah hian kum danga phun tawhte en thlithlai in, a nungsa te tuaihnum a, nung chhuak zo lo te chu thlak a ni. District chhunga SDO(C) leh BDO thut hmunahte Environment & Forest department nen tangrualin Green Mizoram Day pual hian hun hman a ni bawk.