Mizoram hmun dangte rualin vawiin khan Lunglei-ah pawh ‘Green Mizoram Day’ hman a ni a, he Ni puala inkhawm Pukpui Park-a buatsaihah Lunglei High Powered Committee Vice-Chairman Pu S.Laldingliana chu Khuallian a ni.

Green Mizoram Day hawnna inkhawm Lunglei Bawrhsap Pu Ashish Madhaorao More kaihhruaiah Khuallian Pu S.Laldingliana chuan kan rama thing leh mau te kan tichereu nasat avangin kum tinin kan sik leh sa a inthlak danglam chak hle a, kan tu leh fate tana he rama thing leh mau, nungcha leh luite venhima siamthat hi vawiina damte mawhphurhna lian tak a ni, a ti. Leilunga thilsiam dangte nena innghenga khawsa tura duan kan nih avangin mihringte hian Pathian thilsiamte hi dimdawi leh duat taka enkawl hi kan tih makmawh a ni, a ti bawk. Environment & Forests Department-in rampum huapa thingphun lama an hmalakna chu fakawm hle a ni tiin Pu S.Laldingliana chuan department dang ten thing an phunte enkawl hna hi keng chhunzawm ngei se a duh thu a sawi a. Sorkar hmalakna pawimawh tak NLUP pawh hian a tum ber pakhat chu rambua cheithat leh thing leh mau humhalh a ni a; environment humhalh leh siamthat chungchangah midangte zirtirtu i ni theuh ang u tiin kalkhawmte a chah a ni.

Lunglei DC Pu Ashish More pawhin thu sawiin mihringten hmasawnna an um luatna lamah leilung hausakna, thing leh mau te kan tichereu nasa hle a, chuvangin ram kan tihchhiat leh hemi avanga boruak, sik leh sa danglam nasa lutuk ven leh siamthat chu kan tihmakmawh a ni, a ti. Kan fate duat taka kan enkawl seilen ang bawkin kan thingphunte hi enkawl tur a ni a; kan leilung, kan thing leh mau leh nungcha te hi kan ram timawitu leh tihausatu dik tak zawk an ni, a ti.

Vawiin Green Mizoram Day hawnna inkhawmah hian Lunglei District huamchhunga kangmei laka invenna (Fire Prevention) lama khaw tithate leh Department mahni thingphun enkawl thate hnenah Khuallian Pu S.Laldingliana’n lawmman a hlan nghal a. Chungte chu : Fire Prevention : 1)Muallianpui - Rs.50,000/- + Citation ; 2).Serkawn - Rs.30,000/- + Citation ; 3)Lungleng ‘S’ - Rs.20,000/- + Citation ; 4) Consolation prize : Leite leh Lungpuitlang - Citation.

Best Department : 1)UD&PA ; 2)District Industrial Centre ; 3) Economic & Statistics te an ni.

Kumin Green Mizoram Day thupui chu “Thingphun la - Venghim rawh” tih a ni a. Lunglei Pukpui park-ah hian Khuallian Pu S.Laldingliana, DC Pu Ashish More, Conservator of Forests Pu C.Lalengliana leh DFO Pu H.Lianmawia ten thing an phun a ni.

Green Mizoram Day hawnna inkhawmah hian Environment & Forests bakah Lunglei-a sorkar department hrang hrang officers & staff, MJA Lunglei President leh Member te, College leh School zirtitu leh zirlai te, kohhran leh tlawmngai pawl aiawhte an tel tha hle a. Nikuma an thingphunna hmunte sam faiin a hungna an siam a, thing pawh engemawzat an phun belh theuh a ni.