Vawiin chawhnu khan DLAO Conference Hall, Lunglei-ah LAD, Lunglei leh SIRD&PR buatsaihin Lunglei District huamchhunga VC thlanchhuah 35-te hnenah Computer sem a ni. LAD Minister leh Lunglei North Assembly Constituency bialtu MLA ni bawk Pu PC Lalthanliana chuan khuallian niin he computer semna inkhawm hi a hmanpui.

Pu PC Lalthanliana chuan khawtlang tana tangkai tak tur, tunlai khawvel changkang chho zela hmasawnna hmanraw pawimawh tak Computer VC-te hnena a thlawna sem thei tura ruahmanna siam anih chu lawmawm a tih thu sawiin hemi kawnga chak taka hmalatu LAD, Lunglei leh SIRD&PR Mizoram te chu fakawm a tih thu a sawi a. VC kalkhawmte chu vantlang tana inpumpek a, rinawm tak leh tih tak zeta an mawhphurhna hlen chhuak thin tura fuihin Minister chuan khawltlang leh eibar hmasawnna kawnga an hmalakna ah te Sawrkar Department hrang hrang bel hnai thin turin a chah a. Hmasawnna hnathawhna tur sum tam tham tak VC-te kaltlanga thawh thin a nih avangin rinawm tak leh dik taka an thawh a pawimawh a ni tiin VC-te chu hmathlir thui tak nei chunga rorelna dik an kalpui thin a tul a ni, a ti. Minister chuan Mizoram Sawrkar Flagship Programme thar New Economic Development Policy (NEDP) chungchang pawh sawiin NEDP chu hmasawnna rualkhai zawk leh chak zawk kan neih theih na tur a duan a ni tiin thlai tharchhuah te awlsam zawka hralh theihna turin hmun hrang hrang ah Agriculture Link Road te siam mek anih thu a sawi bawk. An computer dawn te chu khawtlang tana tangkai thei ang bera hmang turin Minister hian VC kalkhawmte hi a chah bawk a ni.

Vawiin programme Lunglei DLAO Pu Lalchawimawia kaihhruaiah hian SIRD&PR Director Pi Maria CT Zuali, MCS pawhin thu sawiin VC-te tana training an buatsaih thin dan leh an hmalak dan tlangpui a tarlang a. Vawiina computer sem chu VC leh khawtlang ten an hlawkpui ngei a beisei thu sawiin SIRD&PR Director chuan khawvel hmun hrang hranga hmasawnna hnathawh kalpui dan an zir theihna turin Internet connection ngai pawimawh hmasa  turin a chah bawk.

Vawiin computer semna hunah hian VC thlanchhuah 35-te hnenah Computer leh UPS bakah Printer pek theuh an ni bawk.