Vawiin khan DC Conference Hall, Lunglei-ah District Legal Service Authority buatsaihin 'Laws Relating to Socio-economic Life' tih thupui hmangin Legal Awareness Seminar neih a ni.
Seminar hawnna inkhawm Chief Judical Majistrate, Lunglei Dr.HTC Lalrinchhana kaihhruaiah a hawngtu Lunglei DC Pu.Abhijit Vijay Chaudhari chuan Legal Services Authority hi Mizoram-ah kum 1987 atanga din tan niin District Legal Services Authority hi a hnuaia peng pakhat a nih thu a tarlang a. Dikna chu mipui chanvo a nih vangin dan leh hrai kan hriat a ngai a, ramchhunga mi zawng zawngte chu Dan hnuaia awm kan nih vek angin mipuite kokhawma dan hrang hrang inzirtir hi a pawimawh hle a ni, a ti. District tin ah hian inremna leh inhriatthiamna siam turin Lok Adalat-te pawh buatsaih thin a nih thu leh Department hrang hrang hnathawh leh kalphung hi mipui vantlang ten an hriat ve a, mipuite nen kan thawh ho a ngai a ni, a ti bawk.
Dr.HTC Lalrinchhana, MJS, Chief Judical Majistrate chuan thuhma sawiin Sawrkar chu thawhhona tha leh langtlang nih a ngai a, Sawrkar Department hrang hrang te pawhin Dan leh Hrai chungchang te kan hriat a ngai a, ei leh bara kan intodelh theih dan hi in hrilhhriat a tul hle bawk a ni, a ti.
He Seminar-ah hian Pi T.T.Beikhaizi, ASO-in 'Registration Act, 1908(16of1908) Practice and Issues' chungchang a hrilhfiah a; Inspector PC.Lalchhankima, Exise & Narcotic Department-in 'Mizoram Liquor (Prohibition and Control) Act,2014 :Issues and Challenges' leh Pu Joseph Lalramsanga, Project Director, DRDA-in 'Covergence of various Government Schemes and Policies : Issues and Strategy' a sawifiah bakah leh Pu H.Lianmawia, IFS, DFO-in 'Laws relating to Fire Prevention' tih thupui hmangin zirtirna a pe bawk.
