Private Hospital a RSBY (Rashtriya Swasthya Bima Yojana) hmanga damdawiin awm chungchangah Health Minister Pu Lal Thanzara leh Private Hospital neitu ten vawiin khan CM Conference Hall ah meeting pawimawh tak an nei. Aizawl khawchhung bakah Lunglei leh Champhai atang te in Private Damdawi In neitu leh an aiawh te an kal khawm a. Health Minister hi Pu Lalrinliana Fanai, Commissioner bakah Health Department hotu ten an tawiawm a ni.

Thu pawimawh tak sawi ho tur an nih thu leh ngai pawimawha Private Damdawi In neitu te tha taka an lo tel thei chu lawmthu sawiin meeting kaihruaitu Pu Lal Thanzara chuan thu tlukna fel fai tak an neih ngei a beisei thu leh RSBY kaltlanga BPL chhungkua te, job card neite leh street vendor te damdawi Ina awm man pek sak hi India ram State dangah te hlawhtling taka an lo kalpui mek anih laiin Mizoramah enge kan dinhmun sawiho leh tun aia tha zawk in engtin nge beihpui thlak anih theih ang tih te relho a tul thu a sawi a.

Private Damdawi In enkawltu hrang hrang te chuan RSBY hi a that hle laiin phurrit a ni thei a, tunah pawh hian damlo te awm man leiba a tam hle tawh a. Damlo thenkhat te pawhin Hospital a awm kher an lo ngiat ve thin bawk a, ni 4/5 lek awm tura ngaih ni sawm dawn an awm chang a awm thei bawk . Damdawi bill theih loh lo vawm bei tum tlat te an awm thin bawk nen leiba an tam bakah harsatna hrang hrang te an sawi ho a. Chutih laiin he Policy hi a tha in damlo tam tak in damna an neih phah a, mahni suma in enkawl thei lo mi harsa zawkte tan phei chuan chhenfakawm tak anih thu te pawh sawi ho a ni.

Meeting chuan RSBY ah hian leiba te awm mahse harsatna hrang hrang te chu Health Minister hova sutkian tum nise, Private Hospital te leh RSBY lam thunei tu te nen pawh sawi tlan leh ni se ti a rel in la chhunzawm zel chu pawm tlan a ni.

RSBY hi Below Poverty Line (BPL) chhungkuate’n harsatna an tawha, hospital-a an awm a ngaih palh pawha insurance cover tura ruahhman a ni a. BPL member leh midang hote RSBY scheme hmang duh te chuan Smart card an siam tir thin a, BPL harsatna tawkte chuan Rs. 30,000 man hu an sum hman an bill let leh thei tihna a ni. India ram pumah October, 2007 atang khan lo hman tan tawh a ni a. Mizoram ah chuan Kum 2010 atang khan hman tan a ni a. RSBY hman that avang hian kum 2012 leh 2013-ah National Award hial a lo dawng tawh a ni.