Vawiin khan Convention Centre Lungleiah mahni kutkawiha eizawnna kawnga intihsiakna Business Plan Contest MIZORAM KAILAWN 2019 chungchang inhrilhhriatna hun ‘Outreach Program’ hman a ni.

He hun Pu Lalthakima Chhangte, SDC Lunglei kaihhruaiah hian Entreprenuership Development Scheme (EDS) hnuaia Master Trainer Pi C. Lalremruati, Lunglei DIPRO leh Indian Insitute of Management Calcutta Innovation Park (IIMCIP) mithiam Pi Esther Khiangte ten zirtirna hun an hmang.

EDS Master Trainer Pi C. Lalremruati chuan ram hmasawn tur chuan mahni kutke ngeia eizawnna kawng dap thiam entrepreneurs-te Mizoramin a mawmawh chho zel dawn a ni tiin hetiang rilru themthiamna hmanga eizawnna dap chhuak thei, sumdawnna thar tan tura ruahmanna siam thiam te tanpui na atan Business Plan Competition ‘Mizoram Kailawn’ chu kum 2017 atang khan kum tin hlawhtling taka huaihawt thin anih thu a sawi. Entrepreneur hlawhtling nih chu mi dang tam takte tana malsawmna thlentu, mite eizawnna siamsakna kawng a ni, a ti bawk.

Pi Esther Khiangte, IIMCIP chuan Business Plan Contest 2019 (Mizoram Kailawn) leh Entrepreneurship Summit (E-Summit) October-a neih tur sawifiahna hun a hmang a. He contest-a tel duh te tan mizoramkailawn.org/ ah in register theih niin 9th August, 2019 (Friday) thleng application hi thehluh theih a ni a. He contest-ah hian thalai mahni kutkawiha eizawnna kawng zawh duh te tan tel theih vek a ni tiin zirlai kalkhawmte chu tel ve theuh tur in a sawm a.  6th September, 2019-ah finalist 40 te hming tarlan tura ruahmanna siam niin heng finalist te hian 16th – 19th September chhungin training (boot camp) an nei anga. Heng Finalist Top 40-te hi India ram chhunga Management zirna tha berte zinga mi Indian Institute of Management, Calcutta (IIMC) mithiamten an zirtir dawn a. 23rd September, 2019-ah Entrepreneurship Summit buatsaih tur niin Final Round leh Result puanna hun neih a ni ang.

He hunah hian Lunglei District atanga entrepreneur hlawhtling Mizoram Kailawn 2018 1st Prize Winner organic leitha siam chhuaktu Pu Ramdinmawia (VB Agri Solutions, Haulawng) pawhin thusawina hun hmangin entrepreneur ni tura a hmalakna te leh Mizoram Kailawn-a a thil tawn tlangpui te a sawi a. Indian Institute of Management, Calcutta (IIMC) mithiamte hnuaia training a hlawkpui takzet thu sawiin Lunglei District mipui tam zawk he intihsiaknaa tel ve turin a sawm a ni.

Vawiin programme-ah hian HATIM, Lunglei Government College, J Buana College zirlai thahnem tak leh sawm bik dangte an kalkhawm a. Mithiamten zirtirna an pek zawh ah zirlai kalkhawmte chuan an thil hriat duh hrang hrang te zawtin hun an hmang zui a ni.