Vawiin khan Chief Minister Pu Zoramthanga chuan Agriculture Development Board chu CM Cabinet Meeting Room-ah kawmin Mizorama agriculture tihhmasawnna tura hmalakna thar siam dan turte sawihovin an thukhawm. He meeting-ah hian Board Chairman Agriculture Minister Pu C. Lalrinsanga, Vice-chairman Pu H. Ramzauva, Mizoram State Planning Board Vice-Chairman Pu H.Rammawi leh Adviser to CM Pu C. Lalramzauva te an tel a ni.

Chief Minister chuan agriculture lama hmalaknaah chuan tuna ngaihpawimawh hmasak ber tur chu chaw a intodelh a nih thu sawiin, kan intodelh chuan thenawm state-ah buaina eng emaw lo thlen avanga supply lama buaina kan tawn thin chu a awm tawh dawnlo a ni, a ti a. Agriculture department in an chhut dan in Mizoramah buh leh thlai chin theihna hectare 70,000 chuang a awm a. Remchang taka hman thiam chuan state chhunga cheng mipui chu a chawm zawh vek tur thu sawiin, mipui kan tamloh avangin leh hlawk zawka tharchhuah - large scale production neih theih nan mihring tha chauh a innghat lovin khawl hmanga “mechanised system” a kalpui chu kan tum tur a ni, a ti a. Agriculture Development Board chuan buh a intodelh chu an hmalakna pui ber a nih tur thu Chief Minister chuan sawiin, a bultan na atan leilet siam tawh, khawl hman theih nghalnaah hmalak a, chumi atan chuan society te siam a, khawl leh chi leh lei tha leh mamawh tur hrang hrangte chu society in Board ah thlen in, Board leh department chu thawkhovin an lo ngaihtuah zui sak tur a nih thu a sawi a. Chumi atan chuan Board chuan hmalakna dan tur mumal tak duang a, society inkaihhruaina turte chu fel taka siam turin a chah a. Board hmalakna chuan leilet khawl hman mai theihlohna, ram siam rem chawp ngaite leh leilet siam belh te pawh a hmalak zelna turah a tel chhoh tur thu a sawi.

Chief Minister chuan leilet chu leitha mamawh vek a nih avangin tun dinhmunah chuan loh theih loh avanga chemical fertilizer hman thin ni mahse zawi zawia organic fertilizer a inleh chhoh dan tur board chuan ngaihtuah tura a duh thu a sawi a. A hlawk thei ang bera tharchhuah a awm theih nan fur ruahtui khawlna tur pawh ngaihpawimawh tul a tih thu a sawi.

Vawiin meeting-ah hian Agriculture Department hotute leh Agriculture Development Board member-te an kal thahnem hle a ni.