No.3756/2021-2022

Aizawl the 21st, January, 2022 : Vawiin chawhma khan SP's Office Conference Hall, Lungleiah Mizoram Police din champha vawi sawmnga na (Golden Jubilee) hman a ni. He hunah hian Police thawktute, Police pensioner leh Media te an tel a ni.

Mizoram Police din champha lawmna hun hi Pu. C. Lalfakmawia, Addl. SP, Lunglei in kaihhruaiin Pu Rex Zarzoliana Vanchhawng, SP, Lunglei chuan Police din champha vawi 50 na an thleng thei chu lawmawm a tih thu leh he hun thleng pha ve ta lo an thawhpui hmun hrang hrang ami te a hriat reng thu a sawi. Police te hi service pawimawh tak thawktu an nih avangin khawvel pum ah police hi an pawimawh thu sawiin Police te hi mipui rawngbawltu kan nih angin dan leh thupek kenkawh mai bakah vantlang tana kan theihna zawnah tangkai kan tum a ni tiin Police din champha vawi 50 na a lo thlen hian Police te chu rilru thar pu a, mahni hna theuhah inpekna thar nen hna thawk tur leh midang te tana malsawmna ni theuh turin a chah a ni. Lunglei hi Mizorama Police unit upa ber kan nih angin inrelbawlna ah te, mipui hnena service pek that ah te, police hmunhma humhalh ah te leh kawng tinrenga District dang te entawntlak a kan awm a ngaih thu a sawi bawk ani.

He hunah hian Pu PC.Ngurnghinga, ASI (rtd) leh Pu Lalrinpuia, ASI (rtd) tepawhin thusawina hun neiin Police Martar Constable C. Thangduna (L) chhungte hnenah hriatrengna pangpar hlan a ni a. Baptist Church Orphanage (BCO) leh MBKHP chawmdawlna Inah te thil pek hlan a ni bawk.

Ni 21 January 1972 khan Mizoram hi Assam State hnuai a District Council atangin Union Territory ah hlankai a ni a, hemi ni vek hian Pu IJ Verma, IPS chuan Mizoram Police IGP hmasa ber ni turin charge a la a, chuvangin hemi ni hi Mizoram Police din champha atan a pawm a lo ni ta a ni. Mizoram Police din champha Golden Jubillee hi Lunglei District ah pawh lawmna hun hman niin zingkarah khawlai leh Police hmunhma te tihfai na neih a ni a, Mizoram Police Din champha Golden Jubillee hi Lunglei khawpui pawn a Police Station leh Police Outpost hrang hrangah te an remchan dan anga lawm a ni.