No.3755/2021-2022

Aizawl, the 21st January 2022: Vawiin khan Health Minister Dr. R. Lalthangliana chuan Directorate of Health Services Building, MINECO-ah hawngin, khuallian a ni a; Health and Family Welfare Development Board Vice Chairman Dr. Z.R Thiamsanga chu khualzahawm a ni.

Khuallian Dr. R. Lalthangliana chuan Covid-19 hrileng karah Department Building sak zawh theih a nih leh hawnna programme buatsaih a ni chu lawmawm a ti a. Covid boruak rit tak karah Department chuan hma a sawn zel a, Ayush Department tan building sak vat a ni dawn tih sawiin, district paruk ah hospital tih chang tlun a ni dawn bawk a ni a ti a. Heng district 6 zinga district pathum ah khum 50 awmna leh district pathum dangah khum 50 aia tam awmna buatsaih a ni ang tiin a sawi a. Central Sawrkar Ministry nen pawn inbe pawp in chak taka hmalak mek a ni a, state matching share ngailo in heng hmasawnna hrang hrang te hi neih a ni dawn a, thawktute hlawh bakah a chhung cheina tur an rawn tum vek tur thu minister hian a tarlang a. Kolasib, Mamit leh Serchhip district hospital tih changtlunna pawh bawhzui mek a ni a, Mamit district ah phei chuan kut thlak a nih tawh thu sawiin CMO Quarter leh Nursing School te pawh buatsaih fel a ni tawh a ni, a ti a.

Minister chuan Covid avangin vanduaina tawk nunna chan an awm chu pawi a tih thu sawiin, covid avangin kawng engkimah harsatna tawk mah ila, heng harsatna te hian kawng thenkhatah malsawmna a thlen a, Zoram Medical College ah khum 140 atangin covid awm hnuah khum 300 chuang dah belh a ni a, ICU ah khum 13 atangin khum 70 velah dah belh a ni thei a ni a ti a. Boys' and Girls' Hostel sak belh a ni a, heng bakah paying cabin te pawh sak a ni a ti a. VDRL lap pawh ICMR in phalna pe in sawrkar chuan health services sector ah hma a sawn hle a ni, a ti a. Civil Hospital ab Magnetic Resonance Imaging khawl, cheng vbc 600 chuang man bun nan chak taka hmalak mek a nih thu a sawi bawk a. Heng bakah hian Neprology Department, Cardiology Department tih changtlun nan hmalak mek zel a ni tiin a sawi.

Khualzahawm Dr. Z.R Thiamsanga chuan Directorate of Health Services building thar chuan hnathawhna boruak tha leh inkungkaihna leh thawhhona tha tak thlen zel se tiin a lawmpui thu a sawi a. Building thar neihna a tana sum sawrkarin a dawn theih chhan chu hotu hmasate leh vawiin thleng a thawktute inpekna rah a ni a ti a. Primary Health Centre pawimawhna tarlangin Health Services chu mitin tan a ni a ti a. Health Department tan lakna in Maternal Mortality Rate pawh Mizoram chhungah a hniam zawngin a kal chu hmasawnna a ni tak zet a. Nunna chhanhim hi department in a tum bul ber a ni a, hemi kawnga tan la zual zel turin thawktute zawng zawng a fuih bawk a ni.

Directorate of Health Services Building hi Infant Mortality Rate hniam avanga 13th Finance Commission atanga pawisa state sawrkar in a dawn atangin leh CSS atanga kum 2016 - 2017 inkar leh kum 2019 - 2020 inkar a sum hmuh belh khawma sak a ni a. A vai a sum hmuh hmelh khawm hi cheng nuai 820 a ni. TBL Architectural Consultants, Khatla Aizawl in a sak hna hi August ni 8, 2017 khan an tan a. August ni 8, 2020 a zawh fel tura beisei a nih laiin, covid-19 avangin duh angin hna a chak hleitheilo a, December ni 20, 2021 khan zawh a ni ta a. Building ah floor thum awmin, basement pahnih a awm a ni.

He hun hi Health Secretary Pu R. Lalramnghaka chuan a kaihruai a, Health Services Director Dr. H. Lalchungnunga hnen atangin thusawi tawi ngaihthlak a ni a. Engineer Pu Lalfakzuala'n technical report a pe a, Principal Director Dr. F. Lallianhlira chuan lawmthu sawiin he hun hi a khar a ni.