1446/2023-2024

Lunglei the 10th, Aug' 2023: Vawiin chawhnu khan Govt. Primary School II,  Chanmari, Lunglei ah National Deworming Day 2023 hman a ni. He hunah hian Pi Ramdinliani, IAS, Deputy Commissioner, Lunglei  chuan khuallian niin a hmanpui. Khuallian hian school naupang thlanchhuah te hnenah rulhut hlo Albendazole a eitir a ni.

National De-Worming Day 2023 hmanna Pi Lallianzuali Boihtlung, District Education Officer, Lunglei kaihhruaiah Pi Ramdinliani,  chuan National De-Worming Day hi India rampumah hman niin  atum ber chu naupang Kum 1 atanga kum 19 inkarte rulhut laka ven hi a ni a. Ram hmasawn zelah hriselna kawnga hmalaknate ngaihpawimawh a nih thu sawiin, rulhut pai lo turin tih theih awlsam tak kut silfai that, thlai leh thei eitur silfai that, tui thianghlim chauh in, ekin tha leh thianghlim taka inthiar, eitur khuh that bakah in leh a vel vawn fai te, tha taka zawm a tul thu a sawi a. Rulhut laka fihlim District ni turin rulhut hlo hi ei theuh turin a chah a ni.  Health & Family Welfare Department bakah Education Department te leh NGO a thawktute thawhhona leh thawhrimna kaltlangin National Deworming Day hlawhtling taka hman a ni chu lawmawm a tih thu a sawi bawk a ni.

Dr.K. Lalhmachhuana, District  Immunization Officer, Lunglei chuan mihring tana rulhut that loh zia leh rulhut hlo ei a pawimawhzia te  sawiin rulhut pai te chu an hrisel thei lova,kan ran vulh leh thlai leh thei ei atang te in rulhut hi a pai theih a, thil ei dawn in kut fai taka sil tur a ni. Sa leh thlai te fai taka sil a, hmun bawlhlawh ah ke lawnga kal lo tur leh in leh vel vawn thianghlim a ngaih thu a sawi bawk.

Natioanal Deworming Day ah hian naupang kum 1-19 te hnenah rulhut hlo Albendazole  pek thin a ni a,  Lunglei District chhung a Govt. School, Govt. Aided School, Anganwadi Centre, kum 1-5 Anganwadi Centre a hming ziaklo, naupang kum 6-19 inkar School kallo leh College zirlai te hnenah rulhut hlo pek vek tum a ni a, hemi ni a la hman lo te tan ni 17th, August, 2023 ah Mob Up Day ah pek leh tur a ni. Kumin 1st round ah School 1058 a naupang 75,000 te hnenah rulhut hlo hi pek tum a ni.