Vawiin chawhma khan Government Leitlangpui Higher Secondary School, Lunglei ah National Deworming Day 2018 second round hun hman a ni .Dr. Thani Pachuau, CMO Lunglei chu khuallian a ni.

National Deworming Day hun hi Dr.V.R. Ralte, Asst. Hindi Propagation Officer,DEO Office Lunglei in kaihruaiin Dr. Thani Pachuau chuan Rulhut pai avangin naupang in zirna kawng ah harsatna tam tak an tawk thin a, Rulhut pai te hi chaw tha leh thisen thlakchham avangin an chau thin, an taksa leh rilru thlan lenna  ah an hnufual thei a ni. Heng avang hian central sorkar chuan chak tak in hma a la ta a ni.Vawiin hun pawimawh tak  hi naupang kum 1-19 inkar te hi kan VIP in ni a, Health Department chauh nilovin a kaihhnawih Department School Education, Social Welfare leh Department hrang hrang te thawhhona nena hun hman thin a ni. Tuna zirlai te hi nakin lawka kan ram hruaitu tur in nih avangin hriselna hi in ngaihpawimawh a ngai a, ei leh in uluk te, kut fai taka sil te,kut tin hleh te a pawimawh hle a ni a ti.

Dr. Lalrinthangi, SMO Lunglei chuan National Deworming Day hi National Programme a ni a, kumtin vawihnih February leh August thla ah naupang kum 1-19 inkar te hnenah rulhut hlo pek thin a ni. Rulhut in a taksa khawih chhiat dan te, Rulhut kai dan leh inthlahchhawn dan te sawiin, a invendan tur a sawi bawk. National Deworming Day second round hi Lunglei District chhunga Govt. School, Private School, Anganwadi Centre,Pre School, School kallo leh College zirlai kum 19 hnuailam avaiin school 1042 a naupang 50,878 te hnenah rulhut hlo Albendazole pek tum ani. Vawiin a rulhut hlo ei hman lo te tan ni 17.8.2018 ah pek leh tur a ni.