Mizoram e-Court Project hnuaia hmalakna in langtlang zawka Court kalpui a nih theih nan leh mipuite leh ukil te'n awlsam zawka Courta thubuai ngaihtuah tawh leh kallai mek thlen chin hriat theih nan Kiosk leh Individual Court Public Information Display System hi duan a ni.
Kiosk hi khawl niin, awlsam taka mipui ten District Court, Aizawl hnuaia Judge awm zawng zawng te Court a thubuai ngaihtuah mek te, a thlen chin te, Ukil ding te leh thubuai ngaihtuah leh hun turte a en theih dawn a ni. Kiosk hi Court building first floor-ah hun a ni anga, mahniin thubuai chinchang en duhte hmehchhuah a en mai theih a ni dawn a ni.
Individual Court Public Information Display System hi Mizoram tana a bika siam niin, hmun dangah hman a la nilo. Court tin pawnah he Monitor dah a ni anga, vawiin ni a thubuai ngaihtuah dan tur indawt tarlan thin a nih dawn bakah ngaihtuah mek a nih leh zawh tawh tarlan thin a ni ang. He khawl hmang hian Court chhunga thil thleng mek te chawp leh chilhin Ukil te leh mipui ten Court chhunga luhkher ngailovin, Court pawna Monitor atangin an lo en thei dawn a ni. He display system hmang hian Court a thubuai ngaihtuah chin tarlan a nih bakah dan leh hrai chungchanga mipui hriat tur pawimawh dang te tarlan thin a ni ang.
Mizoram a e-Court project kalpui nan hian kum hnih chhung - 2016-17, 2017-18; tana hman turin Rs.6 Vbc (Cheng vaibelchhe ruk) ruahman a ni a. He project tih hlawhtlinna atan hian desktop computers leh UPS 400, district tina hman tur LAN thlunzawm a ni a, vawiina hawn tak Kiosk hi pariat (8) lei niin, video conferencing tihna tur hmanrua te bakah thil tuldang te lei tawh a ni a. Kiosk leh video conferencing tihna hmanrua hi lei belh leh tura hmalak mek a ni bawk. Ni zung chakna hman tangkai anih theih nan Rs.1.2 vbc ruahman a ni bawk a hei bakah hian 14th Finance Commission hnuaiah digitization of Court kalpui nan Rs.2vbc project ruahman niin, Case record zawng zawng te digitized form a dah a nih theih nan hmalak mek a ni.
Heng hmalakna hrang hrang hmang hian Mizoram Judiciary chuan hmasawnna rahbi pawimawh tak a rap chho zel a, information and communication technology hmangin langtlang rorelna leh dawr awlsam zawk rorelna In a awm theih nan hmalak zel a ni
