1796/2022-2023
Lunglei the 2nd September' 2022: Vawiin khan Govt. JNM Model School, Electric Veng Lunglei ah Naupang kum 1-19 inkar ten rulhut an pai lohna turin rulhut hlo pek beihpui leh rulhutin a nghawng thalote inhrilhhriatna hun National Deworming Day 2022 September ni 2 atanga ni 9, 2022 chhunga Lunglei District-a kalpui tur chu Lunglei Bawrhsap Pu Kulothungan A IAS, chuan a hmanpui.

He hun hi Pi K. Lalrintluangi, Dy.DPC, Samagra Shiksha, Lunglei chuan kaihruaiin Pu Kulothungan A IAS, chuan he programme in a tum ber chu naupang Kum 1 atanga kum 19 inkarte rulhut laka ven hi a ni a. Ram hmasawn zelah hriselna kawnga hmalaknate ngaihpawimawh a nih thu sawiin, rulhut pai lo turin tih theih awlsam tak- kut silfai that, thlai leh thei eitur silfai that, tui thianghlim chauh in, ekin tha leh thianghlim taka inthiar, eitur khuh that leh in leh a vel vawn faite tha taka zawm a tul thu a sawi a. Health & Family Welfare Department bakah Education Department te , Women and Child Development Department te leh NGO a thawktute thawhhona leh thawhrimna kaltlangin National Deworming Day hlawhtling taka hman a ni chu lawmawm a tih thu a sawi bawk a ni.

Dr. Lalrinthangi, Senior Medical Officer Lunglei in NDD Presentation pe in India ramah naupang rulhut pai tam tak an awm avangin India sorkar chuan rulhut pai lohna turin naupang kum 1 - 19 inkar te hnenah kum khatah rulhut hlo ( Albendazole) vawihnih pek tura tih a ni, a ti. Rulhut hian kan taksa a ei tur tha kan khawlkhawmsa te lo ei zovin taksa a ti chak lovin kan harh vang lova, kan dawldangin hriselna kawngah nasa takin nghawng tha lo a nei thei bawk a ni, a ti.,Rulhut hlo hi naupang kum 1 atanga kum 2 inkar te chu a phel a pek tur an ni a, kum 3 atanga kum 19 inkar te chu a puma pek tur a ni. Vawiin a naupang rulhut hlo la ei ve hman lo zawng zawngten Mop Up Day ni 9.9.2022 a hman turah hian a ei leh theih dawn a ni.

Rulhut hlo hi vengtin a Asha te leh Anganwadi thawktuten an mahni veng chhung theuh ah an sem dawn a ni.

Pu V. Lalrinawma, Head Master, Govt. JNM Model School pawhin thusawina a nei a, Pi Lalthlamuani Rokhum, CDPO Lunglei chuan lawmthu sawina a nei bawk a ni.