Vawiin khan rampum rualin Lunglei-ah pawh Sub Hqrs. YMA Hall, Venglai-ah ‘National Rural Water & Sanitation Week’ hawnna neih a ni a, he hunah hian Lunglei Addl. DC Pu Rothuama chu Khuallian a ni.

‘National Rural Water & Sanitation Week’ hawnna inkhawm PHED EE & Secretary, DWSC Lunglei Er.J.Kapkima kaihhruaiah Khuallian Pu Rothuama chuan rampum huapa ‘Swachh Bharat Mission (SBM)’ tan a nih hnuah ram chhunga cheng mipui zawng zawngte pawhin faina leh hriselna lam an ngaihven phah sawt a ni, a ti. Vawiina tui thianghlim in tur leh faina chungchang inzirtirna hapta hawnnaah hian mimal tin ten kan mawhphurhna kan hriat thar theuh a, kan chenna leh a chhehvel vawnfai bakah kan bawlhhlawh leh tuichhia sawngbawl danah hmasawn i tum theuh ang u, a ti bawk. Sorkarin chhungkaw harsa zawkten inthiarna tur (toilet) mumal zawk an neih theih nan sumfai leh hmanrua ten a tanpui thin a, mi thenkhatin heng tanpuinate hi a hmanna tur dik taka an hmang lo thin chu pawi a tih thu leh tun atang chuan sorkar atanga mipuite hriselna leh faina kawnga hmawsanna tur atana sum emaw hmanrua sem thinte chu a hmanna tur dik taka hmang turin a chah bawk a. Vawiina Tui Thianghlim/Faina Hapta hawn tak hi tunkar chhung chauh tan ni lovin kan damchhung atana hmang tur kan ni tih i hrenawn leh theuh ang u tiin kalkhawmte a chah.

SE PHED, Lunglei WATSAN Circle Er.H.Duhkima pawhin thusawiin tui leh faina hi thil kalkawp tlat an ni, a ti a. Tui thianghlim nei tur chuan bawlhhlawh leh tuichhia, zun leh ek te khuahkhirh a, awmza neia tihral a, tangkaia hman a lo ngai bawk si avang hian tui leh faina hi thawhdun zel ngai chi a ni, a ti. PHE Department-in a chhinchhiah ang chuan Lunglei District chhungah hian khua 164 a awm a, tui ziaawm deuha nei hi khaw 45 chauh an awm a, tui harsa khua hi khaw 99 lai an awm a, harsa tak khua hi khaw 20 an la awm tih a tarlang a. Lunglei khawpui Tlawng tuilak mek hi kumin February ni 2 khan tuihna hi darkar 1-ah litre 589000 a haw thei a, thun thla March ni 9 khan darkar 1-ah litre 249000 chauh a haw tawh a, Tlawng tui pump-chhuaktu khawlin darkkar khata tui a pump tur mamawh zat erawh chu litre 450000 a ni thung. Hei hian chiang takin a entir chu thal a lo thlenin kan ram tuihnate hi nasa takin a kam zel a, hetih mek lai hian tuihna chelhdingtu leh tipungtu ramngaw kan vat chereu a, kan hal hluah hluah mai a, a khuin min tuam mup mup bawk a, tuihnate hi leihnuai atangin a tam zawk avangin a putchhuak zo ta lo a ni, a ti. SBM Thupui ber chu ‘One Step Towards Cleanliness’ (Faina lamah pen khat tal) a nih angin mipui zawng zawng ten faina kawngah leh bawhhlawh kan paih/sawngbawl danah kawng khat talin hmasawn i tum theuh ang u, a ti bawk.

Mizoramah chuan thingtlang lamah Swachh Bharat Mission (Gramin) hi PHED in a enkawl a, he programme-a thil thar awm ta chu chhungkhat inkhat ek-in sak puih ve nan ek-in pakhatah Rs.5,100 ni thin kha Rs.12,000-a tihpun a ni a. Faina lamah a titha khuate tan vantlang inthiarna siam nan Cheng nuai 2 leh bawlhhlawh/turil sawngbawl nan khaw khat In 150 chinin Cheng nuai 7, In 300 chinin Cheng nuai 12, in 500 chinin Cheng nuai 15 leh In 500 aia tam awmna chinin Cheng nuai 20 an hmang thei dawn a ni. District tin tan pawisa hmana rulh leh zel tur ‘Revolving Fund’ Cheng nuai 150 aia tam lo chin atangin za zelah 5% hman theih dawn a, hei hi cooperative society te, self-help group te pawhin an hmang tangkai thei dawn a ni. PHE Departent-in a enkawl thin sikula inthiarna siam (school toilet - Rs.3,85,00) chu School Education Department-in a enkawl tawh ang a, Anganwadi toilet (Rs.10,000) hi Social & Child Welfare Department-in a chang thung dawn a ni.

Vawiina ‘National Rural Water & Sanitation Week’ hawnna inkhawmah hian faina leh hriselna lama tan la zual turin kalkhawm zawng zawngte chuan ‘Swachh Bharat Abhyan - Faina Thutiam’ a huhovin an chham nghal a ni. mn