2163/2022-2023
Lunglei 3rd Oct. 2022 : Vawiin khan Association for Voluntary Blood Donation (AVBD), MSACS leh Blood Bank, Civil Hospital Lunglei te buatsaihin Baptist Higher Secondary School, Tucker Hall Serkawnah National Voluntary Blood Donation Day pualin hun hman a ni. Kumin thupui atan ' Donating blood as an act of solidarity. Joint the effort and save lives' tih a ni.

He hun hi Baptist Higher Secondary School Principal Pu H. Zosangliana'n a kaihruai a, zirlaite hnenah thisen pek thatna leh hlutna bakah thisen hnathawh hrang hrang inzirtirna hun hman a ni. Medical Superintendent, Civil Hospital leh AVBD President, Lunglei nibawk Dr. SR. Ngurchamliana chuan thisen pe thei tura natna hrang hrang laka inven dan chung chang sawiin Blood Bank awmna khawpuia chengten a thlawna thisen pek hmangin Blood bank an chawm tur a ni tih a nih angin Lungleiah pawh Blood bank pahnih a awm mek thu a sawi a, dam tha nia inhria thisen pe, HIV hrik vei an lo awm tawh thin tih sawiin HIV hrik kai dan hre vek tawh kan nih angin kan fimkhur lehzual a tul hle tih a sawi bawk.

Dr. Vanlallawma Khiangte, Blood Bank Officer, Civil Hospital, Lunglei pawh in thusawiin zirlai kalkhawmte hnenah thisen pek thatna kawng hrang hrang zirtirin thisen chu mihring nunna hnar ber a nih thu sawiin thisen pek chuan mihring hriselna a siam that zawk dante, heart attack leh stroke lakah vengtu tha tak a nih thu sawiin thisen pe thinte chuan rilru hrisel an neih thin dante a sawi a, thisen pek chu midangte tana malsawmna hlu ber a nih dan sawiin thisen pe zel thei tura natna hrang hrang laka inven that a pawimawh thu leh midangte tana thisen petheitu nizel tura hriselna tha nei tura ei leh inah pawh inenkawl tha turin zirlaite a chah a ni.

National Voluntary Blood Donation Day hi kumtin 1st October ah hman thin a ni a, kumin ah chuan sorkar chawlh anih avangin 3rd October ah hman a ni. National Voluntary Blood Donation Day hi kum 1975 atang khan India ram pumah kum tin hman a ni thin a. A thlawna thisen pek kawnga India rama hmasialtu pawimawh ‘Father of Transfusion Medicine in India’ tih a koh thin Dr. J. G. Jolly piancham hriatrengna niin India ram hmun hrang hrangah awareness campaign leh a thlawna thisen pe tha te chawimawina hun hman thin a ni. AVBD Lunglei hi 19th October, 2001 din a ni a, Lunglei ah Blood Bank pahnih Civil Hospital leh Christian Hospital Serkawn ah awmin zirlai, YMA leh pawl hrang hrang thahnemngaihna avangin damlo ten thisen an dawng thin. HIV hi 100 a 70% te hian sex hman atangin an kai a, 30% te chu inchiuna hriau inhmantawm atanga kai thin an ni.

National Voluntary Blood Donation Day puala hun hmanah hian AVBD Lunglei hruaitute leh Civil Hospital Lungleia thawktu doctor te an tel a ni.