Sorkar laipuiin zirna tihhmasawn nana ‘New Education Policy’ a duanna turah ramchhung State leh District Level-ah inrawnkhawmna nei a, rawtna rawn siam tura a hrilh angin vawiin khan Lunglei-ah pawh DPO Recreation Hall, SSA Lunglei-ah Lunglei DC Pu Ashish Madhaorao More, IAS hovin Education Department-a officials leh mithiamte bakah NGOs (YMA, MHIP, MUP, MSU, MZP), H/S & HSS Principal te, MEMSOT, DIET, Teacher Awardees leh MJA ten Consultation Meeting an nei.

Education Policy Consultation Meeting Lunglei DEO Pu Lalrambuatsaiha kaihhruaiah DC Pu Ashish More chuan India ramah Education Policy kan neih hnuhnung ber chu kum 1986 khan a ni a, kum 30 liam ta chhung khan khawvel a danglam nasa tawh em avangin Education Policy thar kan nei tur hian zirlaite zirtirna kawngah tunlai thiamna leh hmasawnna umpha leh hmangthiam a ni tur a ni, a ti. Sorkar laipuiin ramchhungah District 600 chuang awmte rawnna chang hria a, an rawtna te dah pawimawh nachang a hria hi a lawmawmin ramchhung zirna pawhin nasa takin hma asawnpui ngei a rin thu a sawi a. Zirna Ina zirlai bu an zir (formal education) bakah hian Health & Physical Education te, Arts & Languages, Social Sciences leh Information & Communication Technology te pawh dah pawimawh a tul thu a sawi a, zirlai naupangte chu an talent haichhuak a, an tuina milin chher chho a pawimawh hle a ni, a ti bawk. Kum 18 chin chung lamin Vote thlak theihna chanvo an nei a, heng kan thalai leh mipui mimir te chu education tha an neih lo chuan an aiawh thlan tur tha an hre lo palh ang tih a hlauhawm a, chuvangin Democracy tha kan neih theih nan Education tha a pawimawh hle a ni, a ti. Primary Level-ah zirlai naupangte ziak leh chhiar thiam tir piah lamah an thanlen chho zelnaah all-round development an nei tur hian zirtirtu bakah nu leh pa an pawimawh a, an lehkhazirna bakah an ngaihtuahna leh sukthlek pawh kan kaihhruai a tul em em a. India ram chu hnam hrang hrang, tawng leh sakhaw hrang hrang awmzana a nih avangin chutiang society-ah awmthiam tur leh ramchhunga mi chengte karah inhriatthiamna leh inpawhna tha tak a awm theih nan vawiina kan zirlai naupang, kan tu leh fate kan enkawl thiam a ngai hle bawk a ni, a ti.

Vawiina Consultation meeting neih ah hian Block Resource centre atangin mithiam bik ten thupui thlanchhuah bikah Paper Presentation hun an hmang a, heng Resource Persons te hi : Laltholeha Chhakchhuak, Lalhriatpuii, K.Lalmuanawmi, Lalrempuii, Lalhmangaihzuali, Francis Zosangliana leh Lalhmahruaia te an ni. Vawiina Consultation meeting-a sawihona atanga rawtna awm ang angte chu Directorate of School Education-ah thehluh a ni ang a; District 8-a Consultation Meeting neih atang rawtna lo lutte chu Directorate of School Education chuan Ministry of Human Resource Development, GoI-ah a thehlut thung dawn a ni.