Nimin chawhnu dar 2:00 khan National Institute of Electronics and Information Technology (NIELIT) Pukpui ram,IIDC hmun a Extension Centre atan a din thar chu zirna bul tan nan Pu Joseph Lalhimpuia,Vice Chairman HPC in a hawng. Hawnna programme hi Lunglei Bawrhsap Pu V. Sapchhunga’n a kaihruai a, Pu Pc Lallawmsanga, Principal Secretary, Industries, etc., leh Pu Lalhmachhuana, Secretary, ICT etc., te pawh an tel a ni.
Pu Joseph Lalhimpuia Vice-chairman, HPC chuan ICFAI, Lunglei chu UGC pawmpuina awm hmasa lova din anih avanga thiah a nih hnuah zirna hmun quality sang tak NIELIT Extension Centre din a lo ni thei leh ta chu Lunglei leh Chhimlam zawng zawng tan zirna meichher eng tak leh hmasawnna mellung pawimawh tak a nih thu a sawi a. Hetiang vanneihna leh sawrkar duhsakna hi thalai ten enliam mai lova, chhawr tangkai tur leh thiamna chawk chhuak nana hmang turin a chah a ni. Rual u zawk te chuan sum leh tha tam tak seng in hla tak takah thiamna neih tumin an chhuak thin a.Tunah erawh chuan zirna tha tak tak te pawh thalai ten inlum atangin an pan thei tawh a. Hei hi sawrkar in thalai te khawvel thar a siam sak mek zel te zing a mi a nih thu leh sawrkar inhawnna chu thalai te chhang let thei ngei se a duh thu a sawi a ni. Chhimlam bial te harsatna hria in sawrkar in Mizoram University Campus Lunglei a din a tumna chu University Grant Commission(UGC) pawh in a thuphungin a pawmpui tawh a ni, a ti.
Pu Lalhmachhuana, Secretary, ICT chuan Mizoram chu hnam naupang tak nimahse changkanna leh intodelh kawnga ramchangkang te hnungzui tur in thluak leh thiamna hai chhuahloh tam tak a nei a ni, a ti a. Information Technology leh Communication technology a hmasawnna chu kan hmalakna tam tak te ti awlsam tur leh kan thawh chhuahte ti hlawk tura thil pawimawh hmasa a nih bakah ram venhimna kawnga thil pawimawh tak pawh a ni tel a ni, a ti.
Pu Pc Lallawmsanga, Principal Secretary, Industries Department pawh in NIELIT chu Chhimlam tan hmasawnna mellung pawimawh tak leh bul tan nana tha tak a ni a ti a.Zirna hmun tha neih ringawt chu zirlai ten an hman tangkai loh chuan thil tangkai tak pawh a ni lem lova. Chhimlam zirlai ten he an vanneihna hi hrechiang turin a chah a.India ram Engineering College tha ber berte atang BE zirchhuak 25 % te chauh hi chhawrtlak nghal an ni a, chuta thil lang chu zirna in tha bik a lut zawng zawng te pawh chhawrtlak an ni vek lova. Chhawrtlak leh rawn tlak ni tur chuan zirlaite inpekna a pawimawh ber a ni, a ti.
Tun dinhmun ah NIELIT ah hian Scientist ‘C’ pakhat,teaching staff 5 leh thawktu 3 dangte an awm a. NIELIT Extension Centre ah hian zirlai 97 te tan Course on Computer Concept (CCC) chu March 25 atang khan tan a lo ni tawh a ni.
He NIELIT Extension Centre hawnna inkhawm Lunglei Bawrhsap Pu V.Sapchhunga kaihruai ah hian NIELIT Director Pu T.Prameshivor Singh chuan Technical report tawi a pe a. Sawmbik atang te pawn lawmthu sawi te ngaihthlak a ni bawk a ni.
